EO soty eýropalyq komıssııanyń Google-ge 2,8 mıllıard aıyppul salý jónindegi sheshimin maquldady, dep habarlaıdy Egemen.kz.
Eýropalyq jalpy ıýrısdıksııa soty Eýropalyq Komıssııanyń Google-ge monopolııaǵa qarsy zańnamany buzǵany úshin 2,4 mıllıard eýro (2,8 mıllıard dollar) aıyppul salý týraly sheshimin qoldady.
Eýropalyq basylymdardyń jazýynsha, 2017 jyldyń maýsym aıynda Eýropalyq Odaqtyń (EO) atqarýshy organy ınternettegi izdeý júıeleri naryǵyndaǵy ústem jaǵdaıdy teris paıdalanǵany úshin Google-ge 2,4 mıllıard eýro aıyppul salý týraly sheshim qabyldady. Kompanııanyń bólimshesi bul sheshimge joǵarǵy sotta qarsy shyqty.
Sodan keıin korporasııanyń bas keńesshisi Kent Ýoker: «Google Eýropalyq Komıssııanyń sheshimin qurmetteıdi, biraq kelispeıdi» dep málimdedi jáne kompanııanyń naryqtaǵy áreketteri jarnama berýshiler úshin de, paıdalanýshylar úshin de paıdaly ekenin aıtty. Alaıda, jalpy ıýrısdıksııa soty úkimdi kúshinde qaldyrdy. Sheshimge shaǵymdanýǵa jáne EO Joǵarǵy sotyna jiberýge bolatyndyǵy aıtyldy.
8 qarasha kúni Máskeýdiń Taganskıı aýdandyq soty Reseıde tyıym salynǵan aqparatty óz resýrstarynan alyp tastaýdan bas tartqany úshin Google jáne Telegram-ǵa alty mıllıon rýbl aıyppul salǵany belgili boldy. Atap aıtqanda, Google eki mıllıon tóleýge mindetteldi, al Telegram-ǵa tórt mıllıon aıyppul salyndy.