Aqmola oblysynyń Jaqsy aýylynda bir úıden úsh eresek adamnyń denesi tabyldy, dep habarlaıdy Egemen.kz.
Bıylǵy qarashanyń 14-de saǵat 10:30 shamasynda Jaqsy aýdandyq PB kezekshi bólimine Jaqsy aýyly Táýelsizdik kóshesi, 30 mekenjaıynda ornalasqan turǵyn úıdegi páterden 56 jastaǵy er adamnyń, 50 jastaǵy bir er adam men bir áıeldiń denesi tabylǵany týraly habar túsken.
Kóz jumǵan 50 jastaǵy er adam «Jaqsy sý arnasy» kommýnaldyq kásipornynda elektrık bolyp jumys istese, 56 jastaǵy er adam men 50 jastaǵy áıel - jumyssyzdar. Polısııaǵa habarlap aıtqan adam 50 jastaǵy elektrık telefondy kótermegen soń úıine barǵan, sol kezde páter ishinen úsh adamnyń denesin kórgen.
Aldyn ala anyqtalǵan málimetter boıynsha, úsh adam da ıis tıip kóz jumǵan, denelerinde kúsh qoldaný belgileri joq. Sonymen birge, páter ishinen medısınalyq etıl spırtiniń qaldyǵy bar shólmekter tabyldy.
Oqıǵany Aqmola oblystyq polısııa departamentiniń baspasóz qyzmeti rastady. Qazirgi kezde sot-medısınalyq saraptama taǵaıyndalyp, oqıǵanyń mán-jaıy anyqtalyp jatyr.