Nur-Cultan qalasynyń Memlekettik arhıvi Atyraý oblysynyń Memlekettik arhıvimen birlesip, «Atyraý Táýelsizdik jyldarynda» atty jyljymaly kórmesin uıymdastyrdy. Onyń arty «Elorda arhıviniń fotoqujattaryndaǵy qala tarıhy» atty birlesken is-sharaǵa jalǵasty, dep habarlaıdy Egemen.kz.
El táýelsizdiginiń 30 jyldyǵyn merekeleý aıasynda Nur-Sultan qalasynyń Memlekettik arhıvinde alǵash ret Atyraý oblysy Memlekettik arhıviniń qorlarynan biregeı qujattar men fotomaterıaldar usynyp otyr. Is-sharaǵa óńirlik arhıvterdiń ókilderi, qoǵam qaıratkerleri, joǵary oqý oryndarynyń oqytýshylary men stýdentteri, qala qonaqtary, BAQ ókilderi qatysty.
Ekspozısııada qalanyń qurylǵan sátinen bastap búgingi kúnge deıingi qalyptasý tarıhyn qamtıtyn asa qundy qujattar kórsetildi. Kórme belgili ólketanýshylar men Arhıv seriktesteriniń jeke qorlarynan alynǵan materıaldardan negizdelgen.
Kórmeniń ashylý saltanatynda Nur-Sultan qalasy Tilderdi damytý jáne arhıv isi basqarmasynyń basshysy Sáken Esirkep sala qyzmetkerlerin quttyqtap, osyndaı ıgilikti kezdesýdi uıymdastyrǵanyna alǵys aıtty.
«Arhıv – ulttyń baılyǵy. О́tkendi ulyqtaý ultqa mindet. Qundy qujattardy saqtap, saralap oqyrmanǵa usynyp otyrǵan arhıv salasynyń maıtalmandarynyń eńbegi zor. Eki iri qalanyń shejireli shańyraqtary bas biriktirip, salanyń jandanyýyna jol ashyp otyr. Isterińizge bereke tileımin», dedi S.Esirkep.
Atalǵan kórme barysynda «Nur-Sultan qalasy Memlekettik arhıviniń erekshe qundy qujattar jınaqtarynan» beınejazba kórsetildi.
Atyraý oblysy Memlekettik arhıvimen aldaǵy ýaqytta birlese jumys jasaý úshin Memorondýmǵa qol qoıylyp, sońy ǵylymı-praktıkalyq semınarǵa ulasty. Bolashaqta mundaı mańyzdy is-shara basqa óńirlermen de jalǵasyn tabady.