Osy jolǵy dástúrli jármeńke Táýelsizdik alańynda ótkizildi. Munda Zerendi, Sandyqtaý jáne Aqkól aýdandarynyń ókilderi aýyl sharýashylyǵy ónimderiniń túrlerin keńinen usyndy.
– Bizdiń taýar óndirýshilerimiz 38 saýda núktesinde jumys istep jatyr, – deıdi Zerendi aýdanynyń ákimi Erbol Saǵdıev. – Jergilikti sharýa qojalyqtary men jaýapkershiligi shekteýli seriktestikter ónimniń júzge jýyq túrin saýda sóresine qoıyp otyr. Ásirese, Vıktorov aýylynyń balyna, Isakovkanyń jemis qaınatpalaryna, ósimdik maıyna suranys kóp. Et, sút jáne nan ónimderimizben qatar alty avtokólikke tıelgen jemshóp pen qurama azyqtyń zamatta ótip ketýi qalalyqtardyń da óz aýlasynda mal ósirýge den qoıǵanyn ańǵartady. Muny qoldaý qajet.
Oblystyq aýyl sharýashylyǵy basqarmasy bastyǵynyń orynbasary Bekbolat Elbergenovtiń aıtýynsha, resmı bekitilgen aýdandardan basqa aımaqtardyń ónimderi de kóptep satylýda. Bul elimizdegi molshylyq pen baılyqty kórsetedi. Býrabaı aýdanyndaǵy “Esil-Agro” JShS, “Býrabaı qus” jáne Eńbekshilder aýdanyndaǵy “Qaz Ger Qus” fabrıkalary, Kókshetaý qalasynyń jetekshi kásiporyndary dastarhan mázirimizdi kórkeıtýge áreket jasaǵany kórinip tur. Mundaǵy baǵa da bazarlar men dúkenderge qaraǵanda anaǵurlym arzan.
Jurtshylyq kóńilinen shyqqan jármeńkege qatysýshylardy oblys ákimi Sergeı Dıachenko quttyqtady.
Baqbergen AMALBEK.
Kókshetaý qalasy.