Qazaqstanda 19 taýar bırjasy lısenzııalanǵan. Bul týraly Májilistiń jalpy otyrysynda bırjalyq saýdany damytý jáne jetildirý máseleleri boıynsha zań jobasyn tanystyrǵan QR saýda jáne ıntegrasııa mınıstri Baqyt Sultanov málimdedi, dep habarlaıdy Egemen.kz.
«Ulttyq statıstıka bıýrosynyń derekterine sáıkes bırjalyq mámilelerdiń sany 2009 jylǵy 1 119-dan 2020 jyly 48 000-ǵa deıin, ıaǵnı 50 esege jýyq ósti», dedi Baqyt Sultanov.
Bul rette mınıstr atap ótkendeı, úsh jetekshi taýar bırjasynyń («Astana», BKO, «Kaspıı» bırjalary) bırjalyq taýarlar boıynsha saýda-sattyq kólemi 2020 jyly 291,2 mlrd teńgeni, ıaǵnı barlyq saýda-sattyq kóleminiń 30%-yn qurady.
Baqyt Sultanov zań jobasynda zańnamalyq bazany halyqaralyq talaptar men standarttarǵa sáıkes keltirý, sondaı-aq bırjalyq saýdany damytý boıynsha tolyqtyrýlar kesheni kózdelgenin túsindirdi.
«Olardy júzege asyrý turaqty jáne básekege qabiletti otandyq bırjalyq salany qalyptastyrýǵa múmkindik beredi», dedi ol.