Abaı atyndaǵy QazUPÝ-dyń Biliktilikti arttyrý jáne qashyqtyqtan bilim berý ortalyǵy mektepke deıingi jáne mektepten tys uıymdardyń basshylary, tárbıeshileri men ádiskerlerine «Bilim berý mazmunyn jańartý jaǵdaıynda mektepke deıingi uıymdardyń ınnovasııalyq qyzmetin basqarý» taqyrybynda 80 saǵattyq biliktilikti arttyrý kýrstaryn ótkizdi, dep jazady Egemen.kz.
Kýrsqa 10 oblystan 442 tyńdaýshy qatysty. Onyń ishinde mektepke deıingi tárbıe men oqytý uıymdarynyń 34 meńgerýshisi, 49 ádisker, 305 tárbıeshi, 34 pán muǵalimderi bar.
Atalǵan kýrstardy ótkizý bastamasy Abaı atyndaǵy QazUPÝ-dyń damý strategııasy aıasynda Qazaqstan Respýblıkasyndaǵy mektepke deıingi tárbıe men oqytýdy jańartý jáne qaıta formattaý úrdisinen týyndady. Kýrs baǵdarlamasy Memlekettik jalpyǵa mindetti standartyna jáne mektepke deıingi tárbıe men oqytýdyń úlgilik oqý baǵdarlamasyna sáıkes bilim berý mazmunyn jańartý jaǵdaıynda jańa kásibı mindetterdi sheshý úshin qajetti teorııalyq bilim men praktıkalyq daǵdylardy alýǵa baǵyttalǵan.
Kýrs tyńdaýshylarynyń mektepke deıingi tárbıe men oqytý mazmunyn jańartý boıynsha jańa normatıvtik qujattarmen, ǵylymı-pedagogıkalyq jáne ádistemelik ádebıettermen tanysýǵa, 4K modelin damytý boıynsha bilim berý prosesiniń teorııalyq aspektilerin túsinýde qoldaý alýǵa, mektepke deıingi tárbıe men oqytýdyń memlekettik jalpyǵa mindetti standarty jańa talaptaryna sáıkes pedagogıkalyq qyzmetti iske asyrý boıynsha quzyrettilikterdi jetildirýge, t.b. taqyryptardy túsinýge múmkindik aldy.
Kýrs jumysyna mektepke deıingi tárbıe men oqytý júıesi úshin eń qolaıly zamanaýı pedagogıkalyq tehnologııalar boıynsha materıaldar daıyndaǵan Abaı atyndaǵy QazUPÝ pedagogıka ǵylymdarynyń magıstrleri Saǵynysh Oshakpaeva men Saýle Erkebaeva jáne Batys Qazaqstan oblysy, Bórli aýdandyq bilim bólimi «Aqsaı q. №1 bóbekjaıy» ádiskeri Samal Nugmanova - «Balabaqsha men otbasynyń ózara árekettesýiniń ınnovasııalyq formalary birińǵaı bilim berý keńistigin qurý sharty» taqyrybynda mektepke deıingi tárbıe men oqytý uıymdarynda ata-anamen baılanys baǵytynda jumystardy uıymdastyrý tájirıbesimen bólisti.
Kýrs qorytyndysy boıynsha Abaı atyndaǵy QazUPÝ-dyń akademııalyq ister jónindegi prorektory Maqtaǵalı Bektemesov jáne Akademııalyq máseleler jónindegi departament dırektory Haırýlla Janbekovtyń qatysýymen dóńgelek ústel ótkizildi. Bul is-sharanyń qonaqtary Y. Altynsarın atyndaǵy ulttyq bilim akademııasynyń mektepaldy daıarlyq jáne bastaýysh bilim berý zerthanasynyń meńgerýshisi Bıjan Igenbaeva, orta bilim berý ınstıtýtynyń dırektory Alııa Chokýsheva, Qazaqstan Respýblıksy Bilim jáne ǵylym mınıstrligi, Respýblıkalyq erte jastaǵy balalardy damytý ınstıtýtynyń bólim meńgerýshisi Marııa Ermanova qatysty.
Joǵary oqý orynynyń basshylary tyńdaýshylardy mektepke deıingi bilim berý uıymdarymen jumys baǵyttary týraly habardar etip, ádistemelik qoldaýdyń uzaq merzimdi mańyzdylyǵyn túsindirdi.