Byltyr oblysymyzda Abaıdyń 180 jyldyǵyna oraı Memleket basshysy Qasym-Jomart Toqaevtyń qoldaýymen «Abaıǵa qurmet» aksııasy bastaldy, dep habarlaıdy Egemen.kz.
Búgin Semeıdegi Beıbitshilik aralynda Soltústik Qazaqstan oblysynyń tartýy retinde salynatyn Rámizder alańynyń irgetasyn qalaý rásimi ótti.
Sharaǵa oblys ákimi Berik Ýálı, Soltústik Qazaqstan oblysy ákiminiń orynbasary Nurlan Keńesov qatysty.
Rámizder alańynyń irgetasyn qalaý rásiminde sóz sóılegen aımaq basshysy bul jobanyń aıryqsha mańyzǵa ıe ekenin atap ótti. Memleket basshysynyń bastamasyn qoldap, óńirge Rámizder alańyn syıǵa tartqaly otyrǵan Soltústik Qazaqstan halqyna, oblystyń ákimi Ǵaýez Nurmuhametbetovke óńir jurtshylyǵy atynan alǵys aıtty.
«Memleket basshysynyń bastamasymen hakim Abaıdyń 180 jyldyq mereıtoıyna oraı elimizdiń ár óńiri oblysymyzǵa bir nysannan salmaq. Prezıdentimizdiń osy ıgi bastamasy «Abaıǵa qurmet» atalyp, jaqynda Úkimettiń arnaıy qaýlysy shyqqanyn bilesizder. Bul óńirimiz úshin úlken qoldaý, tutas qazaq jurtynyń, aıbyndy memleketimizdiń hakim Abaı rýhyna, onyń týǵan óńirine degen izgi iltıpaty dep bilemiz. Búgingi ıgi shara elimizdiń qos qıyrynyń birligi men ulttyq biregeıliginiń jarqyn kórinisi dep bilemin. Soltústik Qazaqstan men Abaı oblysy soltústik pen shyǵys shekarada jatqan shalǵaı aımaq bolsa da, nıeti ortaq, tileýi bir ekenin kórsetti. О́zderińiz kórip otyrǵandaı, Rámizder alańy Beıbitshilik aralynda boı kóteredi. Ejelgi Túıemoınaq, qazirgi Beıbitshilik araly tarıhqa baı, taǵdyrdyń tezin kóp kórgen kıeli oryndarymyzdyń biri ekeni sizderge aıan. Bul aralda qyryq jyl boıy dalamyzǵa ýyn shashqan atomdyq synaqtardyń toqtaýyna oraı bıiktigi 20 metrlik «О́limnen de kúshti» monýmenti turǵyzylsa, ıadrolyq polıgonnyń jabylǵanyna 20 jyl tolǵanda bıiktigi 25 metr bolatyn Beıbitshilik stellasy turǵyzyldy. Endi mine Abaı oblysy qaıtadan shańyraq kótergen tusta bıiktigi 35 metr bolatyn Rámizder alańy boı kótermek. Elimizdiń táýelsizdiginiń 35 jyldyǵymen de tuspa tus kelip otyr. Bul úsh taǵan qasıetti Beıbitshilik aralyna endi tolyq maǵyna berip, qalanyń kórki men tarıhyn baıyta túspek. Mundaı Rámizder alańy tarıhymyzda birinshi ret salynǵaly jatqanyn da maqtanyshpen aıta ketken jón. Aldaǵy rámizder kúnine deıin alańnyń qurylysy aıaqtalyp, paıdalanýǵa berilmek», dedi Berik Ýálı.
Nysan dóńgelek pishinde jobalanǵan, dıametri – 28 metr. Jalpy bıiktigi – 35 metr. Rámizder alańy zamanaýı talaptarǵa saı salynyp, aınalasynyń barlyǵy abattandyrylyp, turǵyndar men qala qonaqtarynyń súıikti oryndarynyń birine aınalmaq.
Aımaq basshysy shara barysynda Beıbitshilik aralynda Prezıdenttiń arnaıy tapsyrmasymen qala turǵyndarynyń serýendeýine arnalǵan kólemi 56 gektar bolatyn Ekologııalyq saıabaq salynatynyn aıtty.
Shara barysynda sóz sóılegen Soltústik Qazaqstan oblysy ákiminiń orynbasary Nurlan Keńesov bul bastamanyń el birligin aıshyqtaıtyn rýhanı mańyzyna toqtaldy.
«Ertis jaǵasyndaǵy eńseli Semeıde eldiń rýhyn asqaqtatatyn tarıhı sáttiń bastaýyna kýá bolyp otyrmyz. Memlekettik rámizder alańy men stella qurylysynyń kapsýla salý – bul jaı ǵana qurylys emes, bul – júrektegi Otanǵa degen súıispenshiliktiń naqty kórinisi. Bul joba – Soltústik Qazaqstan oblysynyń uly oıshyl Abaı Qunanbaıulynyń júz seksen jyldyq mereıtoıyna oraı Abaı eline, qasıetti Semeıge jasaǵan tartýy. Bul – aǵaıynnyń aq nıeti, eldiń elge degen qurmeti», dedi ol.
Aıta keteıik, «Abaıǵa qurmet» aksııasy aıasynda elimizdiń birneshe óńiri Semeı qalasyna bir nysannan salyp berýge óz usynystaryn berdi. Mańǵystaý oblysy Dostyq úıiniń qurylysyn bastady. Shymkent qalasy shyǵarmashylyq ortalyǵy men Mádenıet úıin, Túrkistan oblysy kórme ortalyǵyn, Astana qalasy Keleshek mektebin, Aqtóbe oblysy jekpe jek ortalyǵyn, Pavlodar oblysy ústel tennısi ortalyǵyn, Qyzylorda oblysy «Anaǵa taǵzym» ortalyǵyn, Batys Qazaqstan oblysy jelilik saıabaq salýdy, Shyǵys Qazaqstan oblysy Ertis jaǵalaýyn abattandyrýdy josparlap otyr. Almaty oblysy byltyr Semeıdegi Qaraǵaıly yqsham aýdanynda salynǵan saıabaqqa «Altyn adam» eskertkishin ornatty.
Italııada Abaı Qunanbaıulynyń bıýsti ashyldy
Aksııany iri ınvestorlar da qoldap otyr. Atap aıtsaq, «KAZ Minerals» kompanııalar toby Semeıdegi jańa shaǵyn aýdanda 25 myń kórermenge arnalǵan jańa stadıon qurylysyn bastap ketti. Sonymen qatar ulttyq kompanııalar da óz úlesin qosatyn bolady. «Qazaqstan halqyna» qory ınklıýzıvti sport keshenin salyp berýdi josparlap otyr.
Taldyqorǵanda Abaı Qunanbaıulynyń 180 jyldyǵyna arnalǵan poezııa keshi ótti