Prezıdenttiń ishki saıasat máseleleri jáne kommýnıkasııalar jónindegi kómekshisi Arman Qyryqbaev Almaty jastarymen kezdesip, jańa Konstıtýsııa jobasynyń negizgi erejelerin talqylady. Dıalog ashyq ári mazmundy ótti. Stýdentter, belsendiler men qoǵam ókilderi tarapynan kóptegen suraq qoıyldy. Ásirese, jınalǵan qaýymdy jańa Ata Zańdaǵy jastarǵa arnalǵan múmkindikter erekshe qyzyqtyrdy, dep jazady Egemen.kz.
«Jańa Konstıtýsııa jastarǵa ne beredi?» degen saýal kezdesý barysynda eń kóp qoıylǵan jáne de talqylanǵan taqyryptardyń birine aınaldy. Árbir suraqqa ún qatqan Arman Qyryqbaev 15 naýryzda ótetin respýblıkalyq referendýmǵa shyǵarylǵan jańa Konstıtýsııa jobasy tek zamanaýı syn-qaterlerge jaýap berip qana qoımaıtynyn, eldiń uzaq merzimdi damýynyń berik negizin qalaıtynyn atap ótti. Jańa Ata Zańda adam quqyqtarynyń kepildikterine, kásipkerlikti qoldaýǵa, sapaly bilim berýdi qamtamasyz etýge jáne ǵylym men ınnovasııany damytýǵa aıryqsha mán berilgen.
Prezıdent kómekshisiniń aıtýynsha, jańa Konstıtýsııa básekege qabiletti, bilimdi ári tehnologııalyq turǵydan saýatty urpaq ósirý úshin quqyqtyq negizdi qalyptastyrady. Ol jas ǵalymdar men startap-jobalarǵa qoldaý kórsetýdi kúsheıtý memlekettiń strategııalyq basymdyqtarynyń biri ekenin jetkizdi.
Sonymen qatar, kezdesý barysynda jańa Konstıtýsııa jobasynda kórinis tapqan Prezıdenttiń «Ádiletti Qazaqstan», «Taza Qazaqstan» jáne «Zań men Tártip» bastamalaryna aıryqsha kóńil bólindi.
Referendýmnyń qashan ótetini belgili boldy
«Zań men Tártip» qaǵıdaty, qorshaǵan ortaǵa uqypty qaraý, «Ádiletti Qazaqstan» ıdeıasy – Prezıdenttiń jyl saıynǵy halyqqa Joldaýlarynda, maqalalary men sózderinde únemi aıtylyp keledi. Kóp jaǵdaıda olar jastarǵa arnalyp jatady. Jańa Konstıtýsııa mátinin ázirleý barysynda 10 myńnan astam usynys tústi. Olardyń basym bóligi adamǵa baǵdarlanǵan qundylyqtarǵa arnaldy – ádilettiliktiń saltanat qurýy, zań men tártiptiń ústemdigi, qalalarymyz ben aýyldarymyzdyń tazalyǵy, jasampaz ári izgi nıetter. Demek, Memleket basshysy halyqtyń júreginde kópten beri júrgen dúnıelerdi qozǵap júr. Sondyqtan bul ıdeıalardyń jańa Konstıtýsııa mátininde kórinis tabýy zańdy qubylys», dep túıindedi ol.
Referendým jáne jańa Konstıtýsııa: Halyq kóp jınalatyn oryndarda aqparattyq jumys jandandy