Qazaqstan halqy Assambleıasynyń HHIH sessııasynda Qazaqstan Respýblıkasynyń Tuńǵysh Prezıdenti – Elbasy Nursultan Ábishuly Nazarbaev qazaqstandyq patrıotızm, azamattyq teńquqyqtyq qaǵıdattaryn, memlekettik tildiń biriktirýshi rólin, alýan túrliliktegi birlikti ilgeriletý, ultty turaqty jańǵyrtý jóninde sharalar qabyldaýdy tapsyrǵan bolatyn.
Búginde Batys Qazaqstan oblysynda 656,3 myń adam turady. Jaıyq boıynda jarasym tapqan jurttyń ishinde 82 etnos ókili bar eken. Mundaǵy barlyq halyqtyń 76,3%-yn qazaqtar quraıdy. Odan keıingi eń iri etnostyq top orys – 125 myń (19,3%), ýkraın – 9210 (1,4%), tatar – 8400(1,3%), belarýs – 1806, ázerbaıjan – 1668, nemis – 1257. Osy halyqtyń jartysyna jýyǵy, ıaǵnı 47,4 paıyzy oblys ortalyǵy Oral qalasynda turady.
Búgingi tańda Batys Qazaqstan oblysynda 54 etnomádenı birlestik bar. Olardyń 31-i memlekettik organda tirkeýden ótken. Al qalǵan 23 uıym tirkeýsiz jumys atqarýda. Oblys ortalyǵyndaǵy Dostyq úıinde jabdyqtalǵan arnaıy bólmelerde 17 etnomádenı birlestik ornalasyp, júıeli jumys isteıdi.
Batys Qazaqstan oblysy Qazaqstan halqy Assambleıasy keńesi 196 músheden quralǵan. Al respýblıkalyq Assambleıa keńesiniń quramyna Aqjaıyq óńirindegi etnomádenı birlestikterdiń, qurylymdyq bólimshelerdiń, qoǵamdyq uıymdardyń jetekshileri, barlyǵy 29 múshe kiredi.
Etnomádenı birlestikterdiń bastamasymen oblys ortalyǵynda ár etnostyń «Dostyq alańqaılaryn» jabdyqtap, ashý boıynsha jumys júrgizilýde. Sonymen qatar Batys Qazaqstan oblystyq Qazaqstan halqy Assambleıasy etnomádenı birlestik tóraǵalary men ókilderi halyqqa áleýmettik kómek kórsetý maqsatynda túrli qaıyrymdylyq jumystarymen de belsendi aınalysyp keledi.
Batys Qazaqstan oblystyq Qazaqstan halqy Assambleıasy respýblıka boıynsha 2014 jyly alǵashqylardyń biri bolyp oblysta, aýdan ortalyqtary men aýyldyq okrýgterde jáne kásiporyndarda Qoǵamdyq kelisim keńesterin qurý jumysyn qolǵa aldy. Búginde Qoǵamdyq kelisim keńesteri kez kelgen salada qordalanǵan máseleni sheshýge belsene aralasyp, tatýlyq pen turaqtylyqtyń saqtalýyna jergilikti bılik ókilderimen belsene qyzmet atqarsa, ǵylymı-saraptamalyq keńesi etnosaıasat salasyndaǵy máselelerdiń sheshilýine ǵana emes, etnosaralyq qarym-qatynasty zertteýge úles qosýda. Al Aqsaqaldar keńesi qazaqstandyq patrıotızmdi nyǵaıtý, azamattyq, rýhanı jáne mádenı qoǵamdy qalyptastyrýda óz úlesterin qosty. Analar keńesi otbasy ınstıtýtyn qalyptastyrýǵa uıytqy bolyp, otbasy qundylyqtaryn dáripteýde. Kásipkerler qaýymdastyǵy sheteldermen áriptestik qarym-qatynas ornatý, óńirimizge ınvestısııa tartý maqsatynda qyzmet atqarsa, «Tatýlasý» ortalyǵy bitimgershilik júıesin nasıhattap, kóptegen daýdyń tıimdi sheshilýine muryndyq bolyp otyr. Al «Til mura» qoǵamdyq qozǵalysy óńirdegi barlyq ultqa memlekettik tildi tegin oqytyp, til úırengisi kelgen azamattarǵa jaǵdaı jasap otyr.
Pandemııa jarııalanǵaly beri Batys Qazaqstan oblystyq Qazaqstan halqy Assambleıasy kóptegen qaıyrymdylyq shara uıymdastyrdy. Osy kezge deıin muqtaj jandarǵa 190 mln teńgeniń kómegi kórsetilgen. Sonyń ishinde «30 qaıyrymdy is» respýblıkalyq marafony aıasynda oblystyq Assambleıanyń etnomádenı birlestikteri men qurylymdyq bólimsheleri, «Jańǵyrý joly» jastar qozǵalysy, eriktiler «Qaıyrymdylyq kerýeni» aksııalaryn ótkizip, 13 myńǵa jýyq az qamtylǵan jáne kópbalaly otbasylarǵa, Uly Otan soǵysynyń ardagerleri men tyl eńbekkerlerine kómek kórsetti.
О́ńirdegi ultaralyq ahýal qalypty jaǵdaıda. Áleýmettik zertteýler nátıjesi kórsetkendeı, saýalnamaǵa qatysýshylardyń basym kópshiligi, ıaǵnı 96,4%-y oblysta qalyptasqan etnosaralyq qarym-qatynasty turaqty ári jaqsy dep sanaıtynyn aıtqan. Suraý salýshylardyń 96,2%-y ultyna baılanysty kemsitý, quqyǵy buzylý oqıǵasyna tap bolmaǵan eken.
Táýelsizdigimizdiń 30 jyldyǵy tusynda halqymyzdyń «Bir kúngi urys júz kúngi yrysty qashyrady» degen qanatty sóziniń máni men maǵynasyn tereń sezinip, tatýlyqty tý etip kóterip kelemiz. Qazir Qazaqstandy mamyrajaı merekege bólep otyrǵan da dál osy yntymaqqa qonǵan yrys dep bilemiz.
Ǵalı ESQALIEV,
Batys Qazaqstan oblysynyń ákimi, BQO Qazaqstan halqy Assambleıasynyń tóraǵasy