Osydan bir aı buryn Qyzylordada «polısııa qyzmetkeri joǵalyp ketipti» degen áńgime jeldeı esti. El ishindegi áńgime ras eken. Joǵalǵan jigit Nurbek Shómenov degen quqyq qorǵaý organynyń qyzmetkeri bolyp shyqty. Biraq onyń ne óli, ne tiri ekeni belgisiz. Iz-túzsiz joǵalyp ketken. Al kóligi órtenip ketken jerinen tabylǵan. Kúdikti bar. Ol onyń burynǵy bastyǵy kórinedi. Tekserý-tergeý amaldary júrip jatqandyqtan, aqparatty jurtqa jarııa etýge bolmaıdy. Onyń ústine, joǵalyp ketken Nurbek Shómenovtyń tiri ekenine úmit basym-tyn.
Keıinnen kámeletke tolmaǵandar isi jónindegi bólimniń burynǵy basshysy Berik Shımanovtyń osy iske baılanysty quryqtalǵanynan habardar boldyq. Shómenov atalǵan bólimde ınspektor bolyp istegen. Álgi Shımanovtyń jumystan shyǵyp ketýine Nurbektiń tikeleı qatysy bolǵan. О́tken jylǵy Táýelsizdik merekesine oraı polısııa qyzmetkerlerine syıaqy taǵaıyndalady. Másele osy jerde týyndaǵan. Bastyǵy Nurbekke bólingen syıaqynyń teń jartysyn ózine berýdi talap etedi. Al Shómenov oǵan kelispeıdi. Anaý qoqan-loqy jasaıdy. Jas jigit oǵan da ılikpeıdi. Aqyry bolmaǵan soń joǵary jaqqa aryz túsiredi. Nátıjesinde, bólim bastyǵynyń qylmysy áshkerelenip, qyzmetten qýylady. Osy bir jaǵdaı jas polısııa qyzmetkeriniń joǵalýyna sebep bolypty.
Qaı qylmysker óz áreketin moıyndaı qoısyn? Bólim bastyǵy da moıyndamaıdy. Onyń ústine, naqty dálel joq. Tek boljam ǵana. Bir aı boıyna álgi qylmysyn moıyndamaı otyrdy. Bul kezde eldiń nazary basqa jaqqa aýyp, jurt arasyndaǵy joǵalǵan polısııa týraly sóz de tyıylǵan. Desek te, quqyq qorǵaýshylardyń tyńǵylyqty tekserý-tergeý amaldarynyń arqasynda qylmysker óz isin moıyndady. Tipti, jas jigittiń máıiti qaıda jatqanyna deıin aıtyp beripti. Nurbek Shómenovtiń óli denesi qala shetinde kómip tastaǵan jerinen tabyldy. Burnaǵy kúni jer qoınyna berildi.
Polısııa polısııany óltirip jatyr. Jaqsylyq emes, árıne. Qarapaıym halyqtyń quqyn qorǵaıdy degen adamdar bir-birin jer jastandyryp jatsa, nesi jaqsylyq bolsyn?! Qylmys ashyldy. Kináli jazasyn alar. Biraq odan qara jamylǵan otbasynyń qaıǵysy jeńildemeıdi ǵoı...
Erjan BAITILES,
«Egemen Qazaqstan».
Qyzylorda oblysy.