Ulyq merekege arnalǵan basty sharalar aıasynda Qyzylordada shyny zaýyty ashyldy. Ashyǵyn aıtsaq, osy óndiris orny bıyl iske qosylyp, ıgilikke jaraıdy degenge ılana qoıǵandar az boldy. Olaı bolatyn da jóni bar, bul sonaý 2008 jyly Qazaqstan men Qytaı úkimetteri arasynda birikken kásiporyndar týraly jasalǵan kelisimge engen jobalardyń biri edi.
Biraq á degennen-aq bastalýy keıinge shegerile berdi. Tek osydan 6 jyl buryn irgetasy qalanyp, óńir turǵyndary quny qymbat bastamanyń keleshegine úmitpen qaraı bastaǵan. Uzaq jyl kúttirgen zaýytty el ıgiligine berýdiń oraıy endi kelip otyr.
Oblystyq ındýstrııalyq-ınnovasııalyq damý basqarmasynyń basshysy Rınat Sultangereevtiń aıtýynsha, zaýyt jańa tehnologııalardy paıdalanyp, básekege qabiletti ónim shyǵaratyn, elimiz ben óńir ekonomıkasy damýyna tyń serpin beretin aýqymdy joba. О́ndiris orny tolyq qýatyna kóshkende 226 jańa jumys orny ashylady. Al qosalqy óndiristerde 300-ge jýyq adam eńbek etedi. Eń bastysy – jergilikti turǵyndardy jumysqa tartyp, qajetti mamandardy solardyń arasynan daıarlaýǵa basymdyq beriledi.
– El Táýelsizdiginiń 30 jyldyǵyna oraı oblys turǵyndary tabaqsha shyny zaýytynyń kúıdirý peshin iske qosý rásimine kýá boldy. Bul joba aıasynda óńirge 42 mlrd teńgeden asa ınvestısııa tartylǵan bolatyn. Jylyna 197 myń tonnadan asa ónim shyǵaratyn kásiporyn el naryǵyn shynymen qamtamasyz etip qana qoımaı, ónimin shet memleketterge eksporttaıdy. Shyny zaýytynyń iske qosylýy shıkizattyq emes sektordy damytyp, ilespe óndiristerdi qurýǵa múmkindik beredi. Búginde ınvestorlarmen birlesip kompozıttik materıaldar men aına óndirisi jobasyn bastadyq. Byltyr Qazaqstan quny 65 mln dollar bolatyn turmysqa qajetti shynylardy Qytaı, Germanııa, О́zbekstan jáne Túrkııadan alǵan. Zaýyt tolyq iske qosylǵanda kapıtaldyń basqa elderge jiberilýin toqtatamyz jáne eldi Syr boıynan shyǵatyn áınekpen qamtamasyz etemiz, – dedi basqarma basshysy.
Orda Glass Ltd seriktestigi men qytaılyq China Triumph kompanııalary birlesip júzege asyrǵan shyny zaýyty – ındýstrııalandyrý baǵdarlamasynyń negizgi jobasy. О́ndiriste qoldanylatyn shıkizattyń 90 paıyzy ózimizde bar.
– Zaýytta AQSh, Italııa, Belgııa, Fınlıandııa, Qytaıda shyǵarylǵan zamanaýı úlgidegi tehnologııalar qoldanylady. Negizi ónimniń 70 paıyzyn ishki naryqqa baǵyttaımyz. Al qalǵany shetelge jóneltiledi. Qazirdiń ózinde О́zbekstan, Reseı, Túrikmenstan, Tájikstan, Aýǵanstan men Úndistannan tapsyrystar túsýde.
Taǵy bir jańalyq – úlken kólemdi jáne aýyr salmaqty shyny tabaqshalaryn kesýge jáne tasymaldaýǵa robottar qoldanylmaq. Qazir Qazaqstanda syrttan kelgen 1 tonna shyny quny 300-350 dollar bolsa, bizdiń zaýyt óniminiń baǵasy 200-250 dollar kóleminde bolady, – dedi Orda Glass Ltd JShS basqarma tóraǵasy Erjan Saǵynbaev.
Qyzylorda oblysy