Bıyl eski kólikterdi joıýǵa qabyldaý baǵdarlamasy júzege asyrylyp kele jatqan jyldardan bergi rekordtyq nátıjege qol jetti. 2021 jyly qazaqstandyqtar 50 005 kólikti joıýǵa tapsyrdy. Onyń 37 495-i – jeńil kólik, 4 040-y jolaýshylar kóligi jáne 8 470-i – júk kóligi. Isten shyqqan mashınasyn joıýǵa tapsyrǵandarǵa bıyl 13,7 mlrd teńge qarajat tólengen.
Eski kólikterdi joıýǵa qabyldaý baǵdarlamasy iske qosylǵan ýaqyttan beri qazaqstandyqtardan barlyǵy 214 932 kólik qabyldandy.
Aýylsharýshylyq tehnıkasy boıynsha búgingi tańda 3 206 tehnıka tapsyryldy. Onyń 2 348-i traktor, 858-i kombaın. 2021 jyly agrotehnıkalardy qabyldaýǵa barlyǵy 3 380 kvota bólingen bolatyn.
Baǵdarlama aıasynda jeńil avtokólikterge 210 myń, jolaýshy jáne júk kólikteriniń sanatyna qaraı 420 myńnan 630 myń teńgege (126-216 AEK) deıin baǵalanady. Agrotehnıkany tapsyrýshylarǵa 560 myńnan 2 mln teńgeniń jeńildik sertıfıkaty beriledi.
Jeńildik sertıfıkaty baǵdarlamasy boıynsha 54 834 avtokólik qabyldandy. Atalǵan baǵdarlamanyń nátıjesinde otandyq óndirýshiden 29 853 jańa avtokólik satyp alyndy.
Aıta ketý kerek, joıýǵa tapsyrylǵan kólikterdiń basym bóligi 1970-90 jyldary shyqqan mashınalardy qurap otyr.
Aımaqtar boıynsha kólik tapsyrýdyń úzdik bestigin Shymkent, Almaty, Taraz, Qaraǵandy, Pavlodar qalalary bastap tur.
Eske salaıyq, 2021 jyldyń 1 jeltoqsanynan bastap jeńil, jolaýshy jáne júk kólikterin qabyldaý ýaqytsha toqtatyldy. Sebebi, bıylǵa mejeli kvota tolyǵymen ıgerilip otyr. Al aýyl sharýashylyǵy tehnıkasy elektrondy kezekke sáıkes jyl sońyna deıin qabyldanady. Eski kólikterdi qabyldaýǵa qajetti kvota bólingennen keıin 2022 jyldyń qańtar aıynan baǵdarlama qaıta iske qosylady dep kútilýde, dep habarlady О́KM Operatorynyń baspasóz qyzmeti.