Batys Qazaqstan oblysyndaǵy Terekti aýdanynda «Úzdik aýla» jáne «Úzdik aýyl» jobasy qorytyndylandy. Aýdandaǵy 15 okrýg ishinen úzdik shyqqan Aqjaıyq aýyly ákimdigine sý jańa «Gazel» kóligi tabys etildi.
Qazaqstan Táýelsizdiginiń 30 jyldyq merekesi aıasynda uıymdastyrylǵan baıqaýda eldimekendermen qatar qarapaıym eńbek adamdary da dáripteldi. Aýyl azamattaryn sharýashylyqpen aınalysýǵa yntalandyrý maqsatynda erekshe kózge túsken 3 otbasy arnaıy yntalandyrý syılyqtaryna ıe boldy.
Terekti aýdany boıynsha 9 700-den astam aýla bar eken. Sonyń 4 385-i jeke qosalqy sharýashylyǵyn damytyp, eńbek dámin tatyp otyr. Bıylǵy baıqaýda Aqjaıyq aýyldyq okrýginen – Djýrsheshovtar otbasy, Aqsoǵym aýylynan –Arystanovtar, Aqsýat aýylynan – Sarbópeevter, Ańqaty aýylynan – Tórealıevter, Bogdanov, Dolın, Novopavlov, Podstepnyı, Pokatılov, Prırechnyı aýyldarynan – Kırpıchnıkov, Lıtvın, Vlasov, Iýsýpov, Dolbnıa, Kaınýshevter, Uzynkól aýylynan – Elekbaev, Shaǵan aýylynan – Saqtaǵanov, Shaǵataı aýylynan – Qazmuhanbetov, Shalqar aýylynan – Jıenbaev, Fedorov aýyldyq okrýginen – Iаroshenkolar otbasy jeńimpaz dep tanylǵan.
Júldegerlerdi quttyqtaýǵa arnalǵan saltanatty sharaǵa oblys ákiminiń birinshi orynbasary Arman О́teǵulov qatysyp, turǵyndardy Jańa jylmen quttyqtady. Aýyldy abattandyrýǵa belsene atsalysqany úshin jeńimpaz otbasylarǵa motokýltıvator tartý etti.
«Memleket tarapynan shaǵyn jáne orta bıznesti damytýǵa negizdelgen kóptegen baǵdarlama bar. Bıyldyń ózinde aýdanda 375 adam grant alyp, qus, mal sharýashylyǵyn dóńgeletti. Grant alý arqyly sútti baǵyttaǵy sıyr sharýashylyǵyn jolǵa qoıyp, aýylsharýashylyq óndiristik kooperatıvke jan bitirip jatqan jerlesterimiz de jeterlik. О́kinishke qaraı, áli de eshqandaı sharýashylyqpen shuǵyldanbaıtyn 4 356 aýla bar. Búgingideı sharalar arqyly sol turǵyndardy eńbekke tartyp, bos júrgen jastardy eńbekqorlyqqa baǵyttaı alsaq, jobamyzdyń maqsatqa jetkeni dep bilemin», deıdi Terekti aýdanynyń ákimi Tilek Ǵabdýshev.
Batys Qazaqstan oblysy