Almatydaǵy Qazaqstan-Reseı medısına ýnıversıtetiniń halyq medısınasy fakýlteti men Respýblıka halyq emshiligi ortalyǵyndaǵy medısınalyq ázirlik kýrsy jylyna júzdegen túlek ushyrady. Sonyń arqasynda keıingi on-on bes jyldyń ishinde qazaq halyq medısınasy jańa sapalyq deńgeıge kóterildi. Emshiler qatary tabıǵı qabiletin dárigerlik ǵylym jetistikterimen baıytqan, eki eneni tel emgen mamandarmen tolyqty. Olar tuqym qýalaǵan emqostyq qasıetteriniń syrtynda osy zamanǵy emdik-naqtamalyq quraldardy da erkin meńgergen.
Iá, dástúrli medısınany resmı medısınamen ushtastyrǵan búgingi emshilerdiń densaýlyq saqtaý salasynda óz orny bar. Olar qazirde keń-baıtaq Qazaqstannyń túkpir-túkpirinde eńbek etedi. Halyqaralyq jıyndarǵa belsendi atsalysady, alys-jaqyn shetelderge de jaqsy málim.
Kók muhıttyń ar jaq, ber jaǵyn tánti etken qazaq emqostary byltyrǵy jyldy da tolymdy tabystarmen támamdady. Sonyń bir dáleli – Qazaqstan Respýblıkasy Halyq jáne rýhanı emshiler mekemesi jýyrda densaýlyq saqtaý salasyndaǵy Qazaqstan, Reseı, Ýkraına, Belarýs, Ázerbaıjan memleketteri arasynda ótken halyqaralyq baıqaýdyń júldegeri atandy. Mekemeniń bas dırektory, professor Sháken qajy Shyntaev sala kóshbasshysy dep tanylyp, dástúrli jáne resmı medısınany ıntegrasııalaýǵa qosqan úlesi jáne halyq densaýlyǵyn saqtaýdaǵy eńbegi úshin «Qazaqstan dańqy» ordenimen marapattaldy. Mekeme bas dırektorynyń orynbasary Nurgúl О́tebaevaǵa «Eńbektegi jetistikteri úshin» medali tapsyryldy. Al osy mekemeniń bas esepshisi Kúlmeshan Nurǵojaeva, referent-hatshylary Lıýdmıla Chernyh pen Lıýbov Vıegel halyqaralyq baıqaýdy uıymdastyrý komıtetiniń sertıfıkattaryna ıe boldy.
– Táýelsizdik qazaqtyń halyq emin jurtshylyqpen qaıta qaýyshtyrdy. Al Qazaqstan Ulttyq densaýlyq saqtaý palatasynyń quramyna enýi ekinshi tynysyn ashty, – deıdi osy kózaıym oqıǵaǵa baılanysty Qazaqstan halyq emshiliginiń basshysy, professor Sháken qajy.
Qorǵanbek AMANJOL,
«Egemen Qazaqstan».
ALMATY.