Qasym-Jomart Toqaev Almaty qalasyndaǵy qaıǵyly oqıǵalar barysynda qaza tapqan polıseıler men áskerı qyzmetshilerdiń otbasylarymen kezdesti. Prezıdent memleket tarapynan olarǵa jan-jaqty qoldaý kórsetiletinin atap ótti, dep habarlaıdy Egemen.kz Aqordaǵa silteme jasap.
«Olar halqymyzdyń qaýipsizdigi úshin, elimizdiń bolashaǵy úshin óz jandaryn qurban etken naǵyz batyrlar. Biz olardyń erligine tántimiz, eshqashan umytpaımyz. Olar halqymyzdyń jadynda máńgi saqtalady. Sizderdiń otbasylaryńyz nazardan tys qalmaıtynyna sóz beremin. Baspana bolsyn, balalardyń oqýy bolsyn barlyq máselege árqashanda kómek kórsetetin bolamyz», dedi Prezıdent óz sózinde.
Kezdesý barysynda Qasym-Jomart Toqaev áskerı jáne qyzmettik mindetin oryndaý kezinde kórsetken batyrlyǵy, memleket múddesin qorǵaý barysynda kórsetken erlikteri úshin birine jar, birine áke bolǵan marqumdarǵa berilgen nagradalardy týǵan-týystaryna tabystady.
UQK Shekara qyzmeti akademııasynyń kafedra bastyǵy Andreı Kabdınovtiń jary men ulyna II dárejeli «Aıbyn» ordeni, Almaty qalasy Almaly aýdany polısııa basqarmasynyń polısııa-júrgizýshisi Álen Asylhanovtyń jaryna, sondaı-aq Almaty qalasy Almaly aýdany polısııa basqarmasynyń polısııa-júrgizýshisi Rınat Kambetovtiń jaryna III dárejeli «Aıbyn» ordeni berildi.
Sodyrlar qolynan qaza tapqan marqumdardyń týystary budan bylaı bizdiń elimizde dál osyndaı qaıǵyly oqıǵanyń qaıtalanbaýyna senim bildirdi.