● Elimizde zeınetaqyny kóbeıtýge 40 mlrd. teńge jumsalady. Bul 1 sáýirden bastap 1,9 mln. adam zeınetaqysynyń 12 paıyzǵa artýyna múmkindik beredi. Eńbek jáne áleýmettik qorǵaý mınıstri Tamara Dúısenovanyń aıtýynsha, jekelegen sanattardaǵy arnaýly memlekettik járdemaqylar men Semeı polıgonynda zardap shekkenderge birjolǵy aqshalaı ótemaqy da osynsha mólsherge ulǵaıady.
● Qazaqstan men Japonııa arasynda tikeleı áýe qatynasy ashylýy múmkin. Muny Syrtqy ister mınıstri Erlan Ydyrysov Japonııa Syrtqy ister mınıstriniń orynbasary Sınsýke Sýgııamamen kezdesýden keıin málimdedi.
● Ertis ózeniniń О́skemen qalasyndaǵy Jibek matalar shaǵyn aýdany tusyndaǵy arnasyna salynǵan kópir kúrdeli jóndeýden ótkiziledi. Bul úshin qala bıýdjetinen 6 mln. teńge qarjy bólinip otyr.
● Al Qyzylordada Syrdarııa ózeniniń ústine 6 mlrd. teńgege taǵy bir kópir salynady. Qala ákimi Nurlybek Nálibaevtyń aıtýynsha, bul Syr boıyndaǵy bas shahardyń darııanyń eki jaǵalaýyna bólinip ornalasýynyń basy bolmaq.
● Atyraý kásipkerleri Reseı naryǵyna shyǵa bastady. Kedendik odaq aıasynda túrli shekaralyq rásimdeýlerdiń alynyp tastalýy eki el kásipkerlerine tıimdi bolyp otyr. Bir ǵana Astrahan oblysynyń ózinde qazaqstandyq ınvestısııamen 20-ǵa jýyq kompanııa jemisti eńbek etip jatyr.
● Qaraǵandyda zańsyz tekseristerge qarsy shtab quryldy. Kásipkerler bul jańashyldyqty qadaǵalaýshy organdar ókilderimen kezdesýde bildi. Bastama kótergen prokýrorlar qaladaǵy saýda úıleriniń birinde jyljymaly keńes ortalyǵyn uıymdastyrdy.
● Ońtústik Qazaqstan oblysynyń Tóle bı aýdanyndaǵy Qasqasý shatqalynda bıyl taý shańǵysy kýrortynyń qurylysy bastalady. Bul jańalyq oblys ákimi Asqar Myrzahmetovtiń Sochı Olımpıadasyna qatysqan frıstaılshylardy qabyldaýy kezinde aıtyldy. Kezdesý sońynda aımaq basshysy sportshylar men olardyń jattyqtyrýshysyna aqshalaı syılyq tapsyrsa, qala ákimi Darhan Satybaldy Olımpıadada jaqsy óner kórsetken Janbota Aldabergenovaǵa «Daewoo Matiz» avtokóliginiń kiltin tabys etti.
● Qostanaıda sport-saýyqtyrý kesheni ashyldy. Osylaısha sońǵy 4 jylda oblys ortalyǵynda tórtinshi nysan qatarǵa qosyldy. Ony salýǵa 750 mln. teńge jumsalǵan. Ǵımarattyń jalpy aýmaǵy 4250 sharshy metrdi quraıdy.
BNews.kz, Nur,kz, Egemen.kz
habarlary boıynsha daıyndaldy.