Keshe Premer-Mınıstrdiń orynbasary Gúlshara Ábdiqalyqovanyń tóraǵalyǵymen selektorlyq rejimde Úkimet janyndaǵy Densaýlyq saqtaý jónindegi ulttyq úılestirý keńesiniń (UÚK) HHII otyrysy ótti.
Keńeste «100 mektep, 100 aýrýhana» jáne «350 dárigerlik ambýlatorııa, feldsherlik-akýsherlik pýnkt jáne emhana qurylysy» jobalaryn iske asyrý barysy qaraldy.
Densaýlyq saqtaý vıse-mınıstri B.Tókejanov «100 mektep, 100 aýrýhana» jobasy boıynsha 71 nysan qurylysy aıaqtalǵanyn jetkizdi. 28 nysan qurylysy (22 nysan – respýblıkalyq bıýdjet esebinen, 6 nysan – memleket-jeke menshik seriktestigi tetigi arqyly) 2016 jyldyń sońyna deıin iske asyrý kózdelgen.
«350 dárigerlik ambýlatorııa, feldsherlik-akýsherlik pýnkt jáne emhana qurylysy» jobasy boıynsha 103 nysan qurylysy aıaqtalyp, iske qosyldy. 242 nysan qurylysyn (99 nysan – respýblıkalyq bıýdjet esebinen, 126 nysan – jergilikti bıýdjet esebinen, 17 nysan – memleket-jeke menshik seriktestigi tetigi boıynsha) 2016 jyldyń sońyna deıin iske asyrý kózdelgen.
Jobalyq-smetalyq qujattarǵa sapaly saraptama jasalmaýy, nysandardy ýaqytynda iske qospaýy, ákimdik komıssııalardyń qurylys nysandaryn sapasyz qabyldaýy sııaqty júıeli máselelerdiń bolýyna baılanysty Ulttyq úılestirý keńesinde О́ńirlik damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy, Shyǵys Qazaqstan, Soltústik Qazaqstan, Qyzylorda jáne Atyraý oblystary ákimderi orynbasarlarynyń esepteri tyńdaldy.
Ulttyq úılestirý keńesi oblystardyń, Astana jáne Almaty qalalarynyń ákimderine 2014 jyly iske qosý josparlanǵan densaýlyq saqtaý nysandaryn ýaqtyly paıdalanýǵa berý, dárigerlik ambýlatorııalar men feldsherlik-akýsherlik pýnktter qurylysyna jergilikti bıýdjetten ýaqtyly qarjy bólý boıynsha naqty sharalar qabyldaýdy tapsyrdy. Densaýlyq saqtaý mınıstrligine respýblıkalyq bıýdjetten bólingen qarajat ıgerilmegen jaǵdaıda onyń kólemin qysqartý nemese basqa basymdy baǵyttarǵa jumsaý tapsyryldy. О́ńirlik damý mınıstrligine jobalyq-smetalyq qujattarǵa sapaly saraptama jasaý boıynsha sharalar qabyldaý júkteldi.
«Egemen-aqparat».