Búgingi tańda ShQO-daǵy jaǵdaı turaqty. Polısııa qyzmetkerleri men Ulttyq ulannyń áskerı qyzmetshileri erekshe rejımde qyzmet atqarýdy jalǵastyrýda. Bul týraly ShQO Polısııa departamenti baspasóz qyzmetiniń basshysy Tatıana Karpova málimdedi, dep jazady Egemen.kz.
Onyń dereginshe, táýlik ishinde oblysta «102» arnasyna 592 ótinish túsip, olardyń barlyǵy boıynsha jumys júrgizildi. Taldaýǵa sáıkes ótinishter sanynyń ósýi baıqalǵan joq. 16 qylmys isi anyqtalyp, onyń 12-si ashyldy.
«Jaǵdaıdyń turaqtylyǵyn eskere otyryp, terrorızmge qarsy kúres jónindegi respýblıkalyq jedel shtab Shyǵys Qazaqstan oblysynyń aýmaǵynda terrorızmge qarsy operasııany aıaqtaý týraly sheshim qabyldady. Sonymen qatar, buryn belgilengen shekteýlermen «Tótenshe jaǵdaı» rejımi jalǵasýda. Saǵat 23.00 – den 07.00 – ge deıin óńirde komendanttyq saǵat jumys istep tur», dedi Tatıana Karpova.
Sondaı-aq onyń atap ótýinshe, 5 qańtardan bastap Qazaqstan Respýblıkasynyń Ákimshilik quqyq buzýshylyq týraly kodeksiniń 478-baby boıynsha 406 ákimshilik hattama toltyrylyp, 341 adam ákimshilik jaýapqa tartyldy. Bir táýlik ishinde osy bap boıynsha 31 hattama toltyrylyp, 9 adam ákimshilik jaýapqa tartyldy.
«Qylmystyq ister boıynsha ustalǵandardyń sany 94 adamdy quraıdy, sotqa deıingi tergep-tekserý júrgizilýde. Barlyq azamattardy qoldanystaǵy shekteýlerge shydamdylyq tanytýǵa, tótenshe jaǵdaı rejıminiń talaptaryn qatań saqtaýǵa shaqyramyz, óıtkeni barlyq qabyldanǵan sharalar qoǵamdyq tártipti buzýǵa jol bermeýge jáne azamattardyń qaýipsizdigin qamtamasyz etýge, sondaı-aq arandatýshylyqqa boı aldyrmaýǵa jáne buzýshylyqtar týraly polısııaǵa habarlaýǵa baǵyttalyp otyr», dedi ol.