Senat Spıkeri Máýlen Áshimbaevtyń tóraǵalyǵymen Palata otyrysy ótti. Onda depýtattar Beıbit Isabaevty Áleýmettik-mádenı damý jáne ǵylym komıtetiniń tóraǵasy etip saılady, dep habarlaıdy Egemen.kz QR Parlamenti Senatynyń baspasóz qyzmetine silteme jasap.
Al buǵan deıin osy Komıtettiń tóraǵasy bolǵan Murat Baqtııaruly Halyqaralyq qatynastar, qorǵanys jáne qaýipsizdik komıtetiniń múshesi bolyp saılandy. Máýlen Áshimbaev Murat Baqtııarulyna Komıtet tóraǵasy retinde atqarǵan eńbegi, zańnamalyq jumysqa jáne azamattardy alańdatqan ózekti máselelerdi sheshýge qosqan úlesi úshin alǵys bildirdi.
Otyrys barysynda «Zattar men materıaldardyń quramy men qasıetteriniń standartty úlgilerin jasaý jáne qoldaný jónindegi yntymaqtastyq týraly kelisimdi ratıfıkasııalaý týraly» zań jobasy qaralyp, qabyldandy. Bul qujat qazaqstandyq taýarlardy, jumystar men qyzmetterdi jetkizýshilerge osy Kelisimge qatysýshy elderge eksporttaý kezinde Tizilimge engizilgen memlekettik standartty úlgilerdi qosymsha synaqtarsyz nemese zertteýlersiz paıdalanýǵa múmkindik beredi. Mundaı tásil otandyq kásipkerlerge óz aqshasy men ýaqytyn únemdeýge jol ashady.
«Zattar men materıaldardyń quramy men qasıetteriniń standartty úlgilerin jasaýdyń jáne qoldanýdyń ekonomıkamyz úshin mańyzy zor. Búgin qabyldanǵan kelisim – qatysýshy memleketter arasynda osy baǵyttaǵy kelisilgen jumystardy júrgizýdi kózdeıdi. Aldaǵy ýaqytta bul qujat bıznestegi ákimshilik júktemelerdi qysqartýǵa qyzmet etedi. Sondaı-aq, Kelisimge qatysýshy – TMD elderi arasynda ekonomıkalyq jáne ǵylymı-tehnıkalyq yntymaqtastyq úshin kedergilerdi azaıtady dep senemiz», dedi Máýlen Áshimbaev.
Sonymen qatar otyrys kezinde senatorlar ózderiniń depýtattyq saýaldaryn joldap, «qańtar tragedııasynyń» sebepteri men saldaryn taldaý jáne Memleket basshysy Qasym-Jomart Toqaev bergen tapsyrmalardyń iske asyrylýyn baqylaý asa mańyzdy ekenin aıtty.
Senator Lázzat Súleımen beıbit adamdar ádiletsizdiktiń qurbany bolmas úshin «qasiretti qańtar» oqıǵasy kezindegi barlyq derekter muqııat zerttelip, tekserilýi kerek ekenin aıtty. Sondaı-aq ol quqyq qorǵaý organdaryna jetkizilgen jáne ustalǵan adamdardyń qorǵaýǵa jáne bilikti zańgerlik kómek alýǵa qatysty konstıtýsııalyq quqyǵyn qamtamasyz etý mańyzdy ekenin tilge tıek etti.
О́z kezeginde Aıgúl Qapbarova qaıǵyly oqıǵa eńbek salasynda sapaly ózgeris qajet ekenin kórsetip bergenin aıtyp, qazirgi jumyspen qamtý jáne jastardy jumysqa ornalastyrý baǵdarlamalaryn qaıta qaraý qajettigine nazar aýdardy.
Aqylbek Kúrishbaev Premer-Mınıstrine saýal joldap, aýyl turǵyndaryn alańdatqan problemalardy sóz etti. Onyń ishinde eń mańyzdysy jumyssyzdyq ekenin atap ótken senator Palata depýtattary bul máseleni turaqty túrde kóterip júrgenimen olardy sheshý úshin Úkimet tarapynan tıisti sharalar qolǵa alynbaı otyrǵanyn aıtty.
Muhtar Jumaǵazıev álemdik tájirıbege súıene otyryp, aýyl sharýashylyǵy tehnıkalaryna qatysty ýtıldik alym mólsherlemesin azaıtý mańyzdy ekenin aıtty. Qazirgi jaǵdaıda aýyl sharýashylyǵy tehnıkasy 80 paıyzǵa deıin tozǵanda ýtıldik alymnyń qoldanystaǵy normalary otandyq fermerlerge jáne jalpy aýyl sharýashylyǵyna eleýli zalal keltiredi. Munyń saldary azyq-túlik baǵasynyń ósýine ákeledi.
О́z saýalynda Andreı Lýkın elimizdegi túrmelerde jazasyn óteýshilerdiń radıkaldanýyna tosqaýyl qoıý úshin naqty sharalardy iske asyrý kerektigin aıtty.
Nurjan Nursıpatov qyzmettik boryshyn oryndaý kezinde qaza tapqan nemese mertikken jaǵdaıda quqyqtyq tártip qyzmetkerlerin áleýmettik qamtamasyz etý jáne olardyń otbasylaryn qoldaý sharalaryn júıeleýdiń mańyzdylyǵyn atap ótti.
Al, Nurtóre Júsip óskeleń urpaqty otanshyldyq rýhta tárbıeleý máselesin kóterip, ulttyq qundylyqtardy saqtaý jáne dáripteýdiń mańyzyna toqtaldy.