Qazaqstannyń juptyq syndaǵy birinshi raketkasy Anna Danılına Aýstralııa ashyq chempıonatynyń juptyq básekesinde jartylaı fınalǵa joldama aldy.
Qazaqstandyq tennısshi Melbýrndegi dodada brazılııalyq Beatrıs Haddad Maııamen birge shırek fınalda shvesııalyq Rebekka Peterson men reseılik Anastasııa Potapovamen sheberlik baıqasty. Birinshi partııada shvesııalyq-reseılik jup basymdyq tanytty – 6:4. Ekinshisinde Anna men Beatrıs ese qaıtardy – 7:5. Al úshinshi – sheshýshi setti qazaqstandyq-brazılııalyq jup jeńispen támamdady – 6:3. Tartysty ótken báseke 2 saǵattan astam ýaqytqa sozyldy. Anna men Beatrıs fınalǵa shyǵý úshin japonııalyqtar Sıýko Aoıama men Ena Shıbaharamen kúsh synasady. Olar shırek fınalda horvatııalyq Petra Martıch pen amerıkalyq Shelbı Rodjers jubyn 6:1, 6:4 esebimen tize búktirdi.
Sondaı-aq dál osy týrnırdiń jasóspirimder arasyndaǵy básekesinde óner kórsetip jatqan qazaqstandyq tennısshi Arýjan Saǵyndyqova da juptyq synnyń úshinshi aınalymyna shyqty. 17 jastaǵy Arýjan reseılik Ekaterına Haırýtdınovamen birge ekinshi aınalymda grekııalyqtar Mıhaela Lakı men Dımıtra Pavlýdy 6:3, 6:3 esebimen utty.