Aýstralııa ashyq chempıonatynyń qorytyndysy boıynsha Áıelder tennıs qaýymdastyǵy (WTA) jáne kásipqoı tennısshiler qaýymdastyǵy (ATP) jańartylǵan reıtıngin jarııalady.
«Úlken dýlyǵa» sanatyndaǵy jyldyń eń alǵashqy jarysynan keıin qazaqstandyq tennısshilerdiń álemdik reıtıngtegi oryndary asa qatty ózgere qoıǵan joq. Tek Australian Open týrnıriniń juptyq básekesinde fınalda óner kórsetken otandasymyz Anna Danılına reıtıngte 28 saty joǵarylap, 25-orynǵa kóterildi. Jekeleı synda Elena Rybakına 12-shi, Iýlııa Pýtınseva 42-oryndaryn saqtap qalsa, Zarına Dıas 118-satyǵa syrǵydy. Áıelder arasyndaǵy týrnır jeńimpazy aýstralııalyq Eshlı Bartı men 1/8 fınalda súringen Belarýs ókili Arına Sobolenko birinshi jáne ekinshi oryndaryn saqtap qalsa, shırek fınalǵa jetken chehııalyq sportshy Barbora Kreıchıkova úshinshi orynǵa kóterildi.
Erler arasyndaǵy reıtıngte Qazaqstannyń birinshi raketkasy Aleksandr Býblık eki saty joǵarylap, 35-orynǵa turaqtady. Al Mıhaıl Kýkýshkın 16 orynǵa kóterilip, 166-orynǵa jaıǵasty. Dmıtrıı Popko 180-ornynda qalsa, Tımofeı Skatov 236-satyǵa jaıǵasty. Erler básekesindegi reıtıngtiń alǵashqy úshtigi ózgerissiz qaldy. Serbııalyq sańlaq Novak Djokovıch kópten beri alǵashqy oryndy eshkimge bermeı keledi. Australian Open dodasynyń fınalısi reseılik Danııl Medvedev – ekinshi, germanııalyq Aleksandr Zverev úshinshi orynda tur.