QR Premer-Mınıstri Álıhan Smaıylovtyń tóraǵalyǵymen ótken Úkimet otyrysynda turǵyn úı saıasatyndaǵy jáne turǵyn úıdi jaldaý aqysyn sýbsıdııalaýdaǵy jańa tásilder qaraldy, dep habarlaıdy Egemen.kz.
«Azamattardyń ál-aýqatyn jaqsartý - memlekettik saıasattyń eń mańyzdy mindeti. Osy mindetke jetýdiń basym baǵyttarynyń biri – turǵyn úıdiń qoljetimdiligin qamtamasyz etý», dedi Álıhan Smaıylov.
Úkimet basshysy eldegi jalpy qurylys salasy jyl saıyn oń dınamıka kórsetip, ósip kele jatqanyn aıtty. 2021 jyldyń qorytyndysy boıynsha 17,1 mln sharshy metr úı salyndy. Turǵyn úı qurylysyna shamamen 2,4 trln teńge ınvestısııa tartyldy. Biraq, bul kórsetkishke qaramastan, qarapaıym azamattardyń basym bóligi baspana ala almaı júr. Sol sebepten úı kezegine turǵandardyń sany kóbeıip jatyr.
Memleket basshysynyń tapsyrmalaryn iske asyrý aıasynda turǵyn úı saıasatynyń jańa tásilderi ázirlendi. Munda «Otbasy bankine» erekshe oryn beriledi, ol baspanaǵa muqtaj adamdardyń kezegin qalyptastyrý jáne olarǵa jeńildikti turǵyn úılerdi satý boıynsha biryńǵaı operator qyzmetin atqarady.
Qazirgi tańda azamattarǵa úı satyp alý maqsatynda ózderiniń zeınetaqy jınaqtarynyń bir bóligin «Otbasy bankindegi» depozıtterge salý múmkindigi berildi.
Zańnamany reformalaý aıasynda turǵyn úıdi kirisine qaraı satý, arendalyq tólemderdiń bir bóligin sýbsıdııalaý jáne aýyldy jerlerde turǵyn úı salý mehanızmderi engiziledi.
Memleket basshysynyń tapsyrmasyna sáıkes, arendalyq tólemniń bir bóligin sýbsıdııalaý mehanızmin engizý týraly sheshim qabyldandy. Baspanaǵa muqtaj 70 myńǵa jýyq otbasy atalǵan mehanızm aıasynda jaldaý aqysynan únemdelgen qarajatty úı satyp alýǵa jınaı alady.
«Jalpy, jańa tásilder men mehanızmder 10 jyl ishinde turǵyn úı kezeginde turǵan jarty mıllıonnan astam adamnyń baspana máselesin sheshýge jáne memlekettik qoldaýdyń ádiletti, ashyq ári qoljetimdi júıesin jasaýǵa múmkindik beredi», dedi Úkimet basshysy.
Premer-Mınıstr Indýstrııa jáne ınfraqurylymdyq damý mınıstrligine «Báıterek» UBH» AQ-men birlesip, arendany sýbsıdııalaý mehanızmin engizý boıynsha barlyq uıymdastyrý máseleleri men rásimderdi aıaqtap, osy jyldyń 1 mamyryna deıin naqty iske asyrýǵa kirisýdi tapsyrdy.
Rásimderdiń ashyqtyǵyn qamtamasyz etý, sapasyn arttyrý jáne odan ári jeńildetý úshin QR IIDM-ge qurylys salasyn retteýge sıfrlyq tehnologııalardy engizý boıynsha zań jobasyn osy jylǵy 1 sáýirge deıin Úkimetke engizý tapsyryldy.
«Qurylys maýsymyn ýaqytyly bastaýdyń mańyzy zor. Ol úshin óńir ákimderi kún jylynǵan soń qurylys jumystaryn barynsha tezdetý úshin erte bastan jer telimderin bólýdi, jobalyq qujattardy ázirleýdi, qajetti ınfraqurylymdy júrgizýdi qamtamasyz etýi tıis», dedi Premer-Mınıstr.