Beıjińdegi Qysqy Olımpııa oıyndarynyń básekeleri bel ortasyna jetti. Ázirshe álemniń 23 eliniń sportshylary óz elderine medal syılap úlgerdi. О́kinishke qaraı, bul tizimde qazaqstandyq olımpıadashylar joq. Sársenbi jáne beısenbi kúndergi jarys jolyna jerlesterimizden Shyńǵys Rakparov (shańǵy qossaıysy), Olga Tıhonova, Ádil Ǵalıahmetov, Denıs Nıkısha (short-trek), Valerııa Tıýleneva, Ksenııa Shalygına, Angelına Shýryga, Nadejda Stepashkına (shańǵy jarysy) jáne Danııl Vasılev, Sergeı Tkachenkolar (shańǵymen tuǵyrdan sekirý) shyqty.
Bul kúnderi eń úzdik nátıjege short-trekshilerimiz qol jetkizdi. Anyǵyn aıtqanda, Oral qalasynyń týmasy Ádil Ǵalıahmetov 1 500 metrge jarysýda álemniń eń myqty degen 8 sportshysynyń qatarynan kórinip, Olımpııa oıyndarynyń fınalynda baq synady. Bul – Ádil Ǵalıahmetov úshin úlken jetistik. Sebebi ol eresekter arasyndaǵy Olımpıadaǵa tuńǵysh ret qatysyp, birinshi múmkindiginde-aq fınalǵa joldama aldy.
23 jastaǵy otandasymyz «á» degennen shırek fınal básekesin sátti bastady. Jartylaı fınalda qandasymyz biraz ýaqyt kósh basynda kele jatty. Márege jaqyndaǵan tusta ony qarsylastary basyp ozyp, keıin Ádil qaıtadan shabýylǵa shyqqan bolatyn. Osy tusta qytaılyq Jen Sze Veı alǵa ozbaq bolǵan qazaqstandyq sportshyǵa qarsy oıyn erejesin buzyp, jarys jolaǵynan shyǵaryp jiberdi. Tóreshiler ereje buzylǵan sátti uzaq ýaqyt talqylap, nátıjesinde qytaılyq sportshyǵa penaltı berip, jarystan shettetti. Al Ádil A fınalyna tikeleı joldama aldy.
Otandasymyz Olımpıadanyń altyny úshin ótken jarysta álemniń myqtylarymen bir qatarda óner kórsetip, segizinshi orynǵa taban tiredi. Bul qashyqtyqta altyndy 2016 jylǵy jasóspirimder Olımpıadasynyń jeńimpazy, álemniń tórt dúrkin chempıony ońtústikkoreıalyq Hvan De Hon, kúmisti tórt qurlyq chempıonatynyń bes dúrkin kúmis júldegeri kanadalyq Stıven Dıýbýa, qolany Qazaqstan quramasymen birge jattyǵatyn reseılik Semen Elıstratov ıelendi. Elıstratov 2014 jyly Sochıde komandalyq jarysta altyn alsa, tórt jyl burynǵy Phenchhan Olımpıadasynda 1 500 metrde qola medaldy oljalaǵan edi.
О́kinishke qaraı, 1 500 metrde baq synaǵan taǵy bir jerlesimiz Denıs Nıkısha shırek fınalda qulap, ózimen birge kanadalyq sportshyny da jarys jolynan shyǵaryp jiberdi. Sóıtip ol jartylaı fınaldan tys qaldy. Sonymen qatar áıelder arasynda 1000 metrge júgirýde irikteý jarystaryna qatysqan Olga Tıhonova da qarsylasyna soqtyǵysyp qulap qaldy. Sóıtip, tóreshiler Tıhonovany da jarystan shettetti. Endi ol 16 aqpan kúni 1 500 metrge júgirýden synǵa túsedi.
Fınaldyq básekeden keıin Ádil Ǵalıahmetov BAQ ókilderine arnap suhbat berdi. Ol óziniń tuńǵysh Olımpıadasynda fınalǵa shyqqanyn úlken jetistikke balap, aldaǵy iri jarystarda sheberligin shyńdaı túsetinin aıtty. «Osy Olımpıadaǵa qatysyp, fınalǵa shyqqanym úshin erekshe qýanyshtymyn. Sebebi bul – meniń alǵashqy Olımpıadam. Sondyqtan kil myqtylarmen birge júldege talasý men úshin úlken tájirıbe boldy. Fınaldyń sońyna qaraı kúshim jetpeı qaldy. Moıyndaý kerek. Endi kelesi Olımpıadaǵa deıin tájirıbemdi arttyryp, talaı álemdik syndarǵa qatysyp, júlde alýǵa tyrysamyn. Bul nátıjeni ózim senimmen alǵa basqan qadamym dep esepteımin. Bir qyzyǵy, bıylǵy maýsymda eki ret fınalǵa shyqtym. Ekeýinde de Beıjiń aıdynynda óner kórsettim. Álem kýbogynda kúmis alyp edim, bul joly júlde buıyrmady. Dese de, maǵan úlken senim syılaǵan jarys boldy. Fınaldaǵy qarsylastarymnyń barlyǵyn bala kúnimnen bilemin. Olardyń jarysqan sátin teledıdardan kórip óskenmin. Osy oraıda, bizdi únemi alǵa jeteleıtin bapkerimiz Mádiǵalı Qarsybekovke, dáriger, massajshy, psıhologterge rahmet», dedi ol.
Ádil 2017 jyldan beri Qazaqstan quramasy sapynda óner kórsetip keledi. Sol ýaqyttan beri ol álem chempıonattary men Álem kýbogy kezeńderinde el namysyn qorǵap, 2021 jyldyń qazanynda Beıjińdegi Álem kýbogy kezeńinde 1 500 metrde kúmis medal alǵan. 2021 jyly Nıderlandtaǵy álem chempıonatynda 1 500 metrlik jarysta 9-orynǵa taban tiregen. Sondaı-aq Beıjiń Olımpıadasynda aralas komandalyq estafetada 5-oryn ıelengen-di.
Short-trekten Qazaqstan komandasynyń bas bapkeri Mádiǵalı Qarsybekov 1 500 metrde fınalda óner kórsetken shákirtine joǵary baǵa berdi. «Ádil óziniń tuńǵysh Olımpıadasynda fınalǵa shyǵyp, úzdik segizdikke enip otyr. Bul – tórtjyldyq dodasyna alǵash qatysqan sportshy úshin úlken jetistik. Ádil bıylǵy maýsymda nátıjesin jaqsarta tústi. Álem kýbogy kezeńinde kúmis medal aldy. Mine, endi Olımpıadanyń fınalynda úzdiktermen ıyq tirestirip, júldege talasa alatynyn kórsetti. Odan bólek, aralas estafetada baq synady. Alda 500 metrlik jarys bar. Sol synda Ádil Ǵalıahmetov, Abzal Ájiǵalıev pen Denıs Nıkısha el namysyn qorǵaıdy», dedi bas bapker.
Shańǵy qossaıysynda Qazaqstan quramasynan jalǵyz ózi qatysyp jatqan Shyńǵys Rakparov kósh sońynda qalyp qoıdy. Aldymen sportshylar shańǵymen tuǵyrdan sekirýden synǵa tústi. Bul synda jerlesimiz 79,5 metrge sekirip, qorytyndy esepte 69,9 upaı ıelendi. Al shańǵymen jarysýda ol jarys jolyna 38-shi bolyp shyǵyp, máre syzyǵyn 41-shi bolyp kesti. Bul synda altyn medaldy germanııalyq Vınchens Gaıger jeńip aldy. Ekinshi orynǵa norvegııalyq Iorgen Graabak, úshinshi satyǵa aýstrııalyq Lýkas Graıderer jaıǵasty.
Áıelder arasyndaǵy shańǵyshylardyń skıatlon jarysynda norvegııalyq Tereza Iohaýg jasyndaı jarqyldady. Ol qatarynan ekinshi jarysta Olımpıada chempıony atanyp otyr. Kúmis júldeni moınyna ilgen fınlıandııalyq Kerttý Nıskanen osymen úshinshi Olımpıadasynda ekinshi orynǵa taban tiredi. Nıskanen Sochıdegi dodada komandalyq jáne estafetada kúmis alǵan edi. Qola júlde Kerttýdiń otandasy, buǵan deıingi Olımpııa oıyndarynyń kúmis jáne qola júldegeri Krısta Pıarmıakoskıge buıyrdy.
Qazaqstandyq shańǵyshy qyzdar bul joly da úzdik 50 sportshynyń qataryna ene almaı, jankúıerlerdi jerge qaratty. Atap aıtqanda, Angelına Shýryga márege – 52-shi, Ksenııa Shalygına – 53-shi, Nadejda Stepashkına – 57-shi jáne Valerııa Tıýleneva 59-shy bolyp jetti.