Elimizge tanymal kınorejıser, «Qazaqfılm» AQ prezıdenti Aqan Sataev bas qalada ótken alqaly otyrysta ózi basqaratyn kompanııanyń jaǵdaıy máz emes ekendigin aıtty, dep habarlaıdy Egemen.kz «Astana» telearnasyna silteme jasap.
«Biz jumys istep jatyrmyz, barynsha tyrysyp baǵamyz. Biraq stýdııa tapqan barlyq qarajat ókinishke qaraı, qyzmetkerlerdiń jalaqysy men ákimshilik-sharýashylyq qajettilikterge jumsalady. Shyndyǵyn aıtqanda, óz fılmderimizdi shyǵarýǵa da qarajat jetkiliksiz. Sondyqtan, bizge óz fılmderimizdi shyǵarý úshin áli de qoldaý qajet», dedi Sháken Aımanov atyndaǵy «Qazaqfılm» AQ prezıdenti Aqan Sataev.
Bas qalada ótken jınalysta mádenıet salasyndaǵy quldyrap turǵan máseleler qozǵaldy. Máselen, kitap baspasy, muraǵatshylardyń jalaqysy, mádenı nysandardy qaıta jóndeýden ótkizý jaıynda áńgime qozǵaldy. Jaýapty mınıstrliktiń habarlaýynsha, el ishinde 7 myńnan astam mádenı ortalyq bar. Alaıda onyń kóbi eski nysandar. Kitaphanalar men arhıv isi de qoldaýǵa zárý. Sala mamandary da birqatar kemshilikterdi aıtty. Olar aýyldaǵy kadr tapshylyǵy, qazaq tilinde jazylǵan kitaptardy satý men baspa isin damytýdyń qajet ekenin jetkizdi.
Aıtylǵan máselelerdi tyńdaǵan Mádenıet jáne sport mınıstri Dáýren Abaev olqylyqtardyń birtindep sheshiletinin aıtty.
Aıana Toǵanbek
EUÝ stýdenti