Qyzylorda oblysynyń kásipodaqtar ortalyǵy kásipodaq uıymyn qurý bastamasy úshin 2021 jyldyń qyrkúıek aıynda jumystan shyǵarylǵan «KazPetrolGrýpp» munaı kompanııasynyń 12 qyzmetkeriniń quqyǵyn qorǵaı aldy. Jumys berýshi men jumysshylardyń bastamashyl top músheleri arasyndaǵy sot isi Kásipodaqtar federasııasynyń erekshe nazarynda boldy.
QRKF tóraǵasynyń tapsyrmasy boıynsha Qyzylorda oblysynyń kásipodaqtar ortalyǵynyń ókilderi Marat Báıimbetov pen Maıra Boranbaeva oblystyq eńbek ınspeksııasymen birge sot prosesi barysynda jumysshylardy qorǵaýǵa belsene qatysty. Sonymen qatar Kásipodaqtar ortalyǵynyń bastamasymen bul másele áleýmettik áriptestik jónindegi oblystyq úshjaqty komıssııanyń qaraýyna shyǵarylyp, kásipodaq alańynda jumys berýshimen de birneshe ret talqylandy.
Jýyrda sot jumys berýshiniń jumyskerlermen eńbek shartyn buzý áreketin zańsyz dep tanyp, isti toqtatty. Qyzylorda qalalyq sotynyń sýdıasy M.Toǵyzbaeva azamattardy óz jumystaryna qaıta turýy jáne májbúrli bos júrgen ýaqyttaryna jalaqy tóleý týraly aryzdaryn qanaǵattandyrý týraly bilikti, ádil sheshim shyǵardy.
Sot jumys berýshi eńbek shartyn buzǵanda basshylyqqa alǵan eńbek shartyn Eńbek kodeksinen 2020 jylǵy 4 mamyrdaǵy ózgeristermen alynyp tastalǵan 50-baptyń 3-tarmaǵy boıynsha buzýy zańsyz, bul norma azamattardyń eńbek quqyǵyn nasharlatatyn norma dep tanydy.
Quqyqtary qorǵalǵan jumyskerlerdiń biri Azamat Qaljanov áriptesteriniń atynan áleýmettik-eńbek quqyqtaryn qorǵaýǵa atsalysqan kásipodaqtarǵa alǵysyn bildirdi.
«Sot prosesi bizdiń, ıaǵnı jumystan negizsiz bosatylǵan 12 jumyskerdiń talap aryzdaryn tolyq qanaǵattandyrdy. Ádildik jeńdi. Sot tóraǵasynyń sheshimimen biz jumysymyzǵa qaıta ornalastyq. Kásipodaqtardyń kómeginsiz biz buǵan qol jetkize almas edik. Bizdiń muńymyzdy, narazylyǵymyzdy tyńdap, sonaý 2021 jyldyń qyrkúıek aıynan bastap, óz qolymen jetektep, ár esiktiń, ár mekemeniń tabaldyryǵyn tozdyryp, mezgilsiz bolsa da, bos ýaqytynyń barlyǵyn bizge arnap kómek kórsetip kelgen, áli de kómektesýden taıynbaıtyn Kásipodaqtar ortalyǵynyń ókilderi Marat Báıimbetov pen Maıra Boranbaevaǵa 12 jumyskerdiń jáne olardyń otbasynan, aǵaıyn týys-baýyrlarynan sheksiz alǵys!», deıdi Azamat Qaljanov.
Aıta ketý kerek, bastamashyl top músheleri aldaǵy ýaqytta kásipodaq uıymyn qurýdy josparlap otyr. Bul eńbek ujymyndaǵy jaǵdaıdyń odan ári damýy Qazaqstan Respýblıkasy Kásipodaqtar federasııasynyń baqylaýynda bolady.