Ýkraınanyń birneshe qalasynda urys júrip jatyr. Ýkraına men Reseı ókilderiniń arasynda eki el arasyndaǵy qaqtyǵystar bastalǵaly beri alǵash ret kelissóz ótti.
Ýkraına prezıdenti Volodımır Zelenskıı bul kezdesý nátıjesine úlken úmit artpaıtynyn ashyq aıtqan. Alaıda ol beıbitshilik ornatýǵa nıetti ekenin kórsetý úshin Ýkraına ókilderin kelissóz júrgizýge jibergen.
Kelissóz bolady degen ýaqytta Harkov qalasynda keskilesken urys júrip jatty. Jarylystar tańerteń Kıev pen Harkovta estilse, soltústiktegi Chernıgov qalasyndaǵy turǵyn úıge zymyran túsken. Ýkraına prezıdentiniń ákimshiligi atysty dereý toqtatyp, Reseı áskerleriniń el aýmaǵynan shyǵarylýyn talap etip otyr. Kelissózge qatysýshy Reseı ókili Vladımır Medınskııdiń aıtýynsha, Máskeý eki taraptyń múddelerine saı keletin kelisimge qol jetkizgisi keledi. Kezdesý bastalar aldynda Ýkraına prezıdenti Volodımır Zelenskıı Reseı áskerlerin shabýyldamaýǵa shaqyrǵan edi.
Taǵy bir mańyzdy másele, Ýkraınanyń Eýropalyq odaqqa qosylýy týraly bolyp tur. Zelenskıı Eýroodaq múshelerine óz elin uıym qataryna tez arada qosý týraly úndeý joldady. «Bizdiń maqsatymyz – barlyq eýropalyqtarmen birge, eń bastysy, teń dárejede bolý. Men munyń ádil sheshim ekenine senimdimin. Jáne bul múmkin ekenine senemin», dedi ol.
Osyǵan deıin Eýropalyq odaqqa múshe memleketter jetekshileriniń otyrysynan keıin bergen suhbatynda Eýropalyq komıssııa tóraǵasy Ýrsýla fon der Lıaıen Ýkraınany Eýroodaq qataryna qosylýǵa shaqyrdy. «Biz tyǵyz yntymaqtastyqta jumys isteımiz, mysaly energetıka boıynsha. Odan bólek birlesken jobalarymyz kóp, ýaqyt óte kele olar bizge jaqynyraq bolyp ketti. Ýkraınanyń bizge qosylǵanyn qalaımyz», dedi Eýropalyq komıssııa tóraǵasy.
Sondaı-aq Ýrsýla fon der Lıaıen Euronews telearnasyna bergen suhbatynda: «Eýropalyq odaq tarıhta alǵash ret shabýylǵa ushyraǵan elge qarý-jaraq pen basqa da jabdyqtardy satyp alýdy jáne jetkizýdi qarjylandyrady», dedi. Eýrokomıssııanyń málimeti boıynsha qarý-jaraq satyp alýǵa 450 mıllıon eýro jáne taǵy medısınalyq qural-jabdyqtar alýǵa jumsaý úshin 50 mıllıon eýro berý josparlanyp otyr.
«Biz Eýroodaqtyń áýe keńistigin Reseıge jaýyp jatyrmyz. Biz Reseıge tıesili, Reseıde tirkelgen, Reseı baqylaýyndaǵy barlyq ushaqqa tyıym salýdamyz. Olar endi Eýroodaqtyń áýe keńistigi arqyly usha almaıdy», dedi Eýrokomıssııa tóraǵasy.
Eýropalyq odaq sondaı-aq reseılik RT jáne Sputnik telearnalarynyń habar taratýyna tyıym salady jáne bul olardyń enshiles kompanııalaryna da qatysty. Sanksııalardyń bólek paketi Aleksandr Lýkashenko bıligine de qarsy.
Odan bólek, Eýroodaqtyń qorǵanys mınıstrleri Ýkraına-Reseı daǵdarysyn talqylaýǵa shaqyryldy. EO-nyń Syrtqy ister jáne qaýipsizdik saıasaty jónindegi ókili Ýkraınadaǵy qaqtyǵysty talqylaý úshin bloktyń qorǵanys mınıstrlerimen kezdesti. Jıyn ýkraındyqtarǵa jedel gýmanıtarlyq kómekti úılestirýge arnaldy.
Ýkraına prezıdenti sondaı-aq elin qorǵaý úshin áskerı tájirıbesi bar sottalǵan azamattardy qamaýdan bosatatynyn málimdedi. Onyń aıtýynsha, bul moral jaǵynan qansha aýyr sheshim bolǵanymen, qorǵanys turǵysynan paıdaly bolmaq.
Al el astanasy Kıevte qoǵamdyq kólik shekteýli rejimde jumys isteı bastady. Bul týraly Kıev meri Vıtalıı Klıchko habarlady.
Reseı tarapy urysqa jumsalǵan shyǵyndar jaıly aıta bastady. Alaıda naqty sany berilmedi. Reseı prezıdentiniń baspasóz hatshysy Batys elderi salǵan sanksııalarǵa qatysty pikirinde Reseıdiń sanksııanyń salqynyn jeńýge áleýeti jetetinin málimdedi.
Degenmen Reseı qarjy naryǵyna salynǵan sanksııalardyń áseri de bilinip jatyr.
Birikken Ulttar Uıymynyń Bosqyndar isi jónindegi agenttigi 422 myń adam Ýkraınadan kórshi elderge shekara asqanyn habarlady. Kórshiles elder shekarasynda azamattar 72 saǵatqa deıin kezekte turǵan.