Bizdiń keıipkerimizdiń aty-jóni – Rahat Qadyrbekov. Onyń jasy otyz birde eken. Rahat qazir Qarasaı aýdanyndaǵy Kókózek aýylynda turady. Jol-kólik apatynyń saldarynan bes jasynda múgedek atanyp, sol ýaqyttan beri arbaǵa tańyldy. Alaıda ómirdiń qıyndyǵynan súrinbeı ótip, qaısarlyǵy men batyldyǵyn kórsetti.
Rahat aqparattyq tehnologııalar boıynsha maman atanyp, birneshe jyl jeke kompanııanyń birinde veb-maman bolyp jumys istedi. Sondaı-aq beınemontaj negizderi boıynsha úsh aılyq kýrsty oqyp shyqty.
– Kóptegen kompanııanyń keńseleri arbadaǵy adamdar úshin beıimdelmegen soń olardyń jumysqa alýǵa múmkindigi joq. Men únemi qozǵalysta bolǵym keldi, belsendi túrdegi jumys unaıdy. Uzaq ýaqyt boıy jumys izdep, óz bıznesimizdi ashý eń ońtaıly is bolady dep sheshtim. Aýdandyq kásipkerler palatasyna júginip, onda maǵan jan-jaqty keńes berip, memlekettik qoldaý sharalarymen tanystyrdy. Erekshe qajettilikteri bar azamattardyń tabysty kásipker atanyp jatqanyn jetkizdi. Tabysty oqıǵalar meni shabyttandyryp, jeke kásibimdi ashamyn degen úmit syılady. Osylaısha, «Bastaý bıznes» oqytý jobasyna jazylyp, oqýdy aıaqtaǵannan keıin 200 AEK kóleminde grant utyp aldym, – deıdi keıipkerimiz.
Rahat grant qarajatyna ýaq mal satyp alyp, qazir 12 qoıdy óz aýlasynda baǵyp otyr. Aldaǵy ýaqytta jylqy satyp alýdy oılap júr. Úı mańyndaǵy baý-baqshada jońyshqa ósiredi. Árıne, arbaǵa tańylǵan adam túgili, mundaı isterdi ıgerip ketý saý adamnyń ózine syn. Al bul baǵytta Rahatqa jaqyndary kómektesip keledi.
Aıtpaqshy, Almaty oblysynda «Eńbek» baǵdarlamasy sheńberindegi «Bastaý Bıznes» kásipkerlik negizderin oqytý jobasy boıynsha bes jyl ishinde 16 myńnan asa jumyssyz jáne isin jańa bastaǵan kásipkerler oqytyldy. О́tken jyldary aıaqtaǵandardy eskere otyryp, joba boıynsha oqytylǵandardyń ishinen 6 328 bıznes-joba memlekettik baǵdarlamalar boıynsha granttyq qarjylandyrý men jeńildetilgen nesıe alǵan kórinedi.
Sonyń biri – Rahat Qadyrbekov. Kásipker qoldaý bildirgen jandarǵa rıza. Ol memleketke, zamanyna, qaıyrymdy adamdarǵa, at ústindegi azamattarǵa únemi alǵys aıtyp otyrady.
Almaty oblysy