Prezıdent Q.Toqaev elimizdegi jetekshi saıası partııanyń kezekten tys sezinde uıymnyń ataýyn Amanat dep aýystyrý týraly: «Bul – elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń baıtaq jerimiz – bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettik dástúr jalǵastyǵy, urpaq sabaqtastyǵy degenimiz – mine, osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», deı kelip, «Amanat» sózine baılanysty óte keń talǵamdy pikir aıtady.
Amanat ataýy partııamyzǵa keleli mindetter júkteıtin bolsa, sonyń biri de, biregeıi atadan balaǵa mıras bolyp kele jatqan erekshe qasıetterdiń biri ımandylyq der edim. Imany bar azamattardan esh ýaqytta jamanshylyq shyqpaıdy. Amanatqa qııanat jasamaıtyndar da osylar. Onyń ishinde tilimiz, dinimiz ben dilimizge qatysty mańyzdy máseleler taǵy bar. Olaı bolsa, Amanat partııasy jastarymyzdy ımandylyq pen otansúıgishtik qasıetke, adamdar arasyndaǵy syılastyq pen yntymaq-birlikti saqtaýǵa, jaýapkershilikke tárbıeleý baǵytyn ustanýǵa tıis.
Partııa urpaq tárbıesine qatysty ulttyq qundylyqtarymyzdy keńinen dáriptep, ana tilimizge degen janashyrlyǵymyzdy arttyryp, qanymyzǵa sińgen qazaqy sán-saltanatymyzdy berik ustap, ony jandandyra túsýge basa kóńil aýdarýy kerek. Dástúrli ónerimizdi keńinen qalyptastyryp, ony óskeleń jas urpaqtyń boıyna tereń sińire bilgende ǵana biz qazaqy qalpymyzdy keıingilerge amanat etip qaldyra alamyz. Prezıdentimiz aıtyp otyrǵan urpaq jalǵastyǵy degen mine osy.
Búgingi Jańa Qazaqstannyń aldynda turǵan bıik mindetterdiń biri – halyqty til shubarlyǵynan barynsha tazartyp otyrý desem artyq bolmas. Aıta ketý kerek, syrly sazymyz ben áýezdi áýenimiz de burmalanyp barady. Dástúrli ásem ánderimiz ben tátti kúılerimiz óte sırek oryndalady. Al dańǵaza-daraqy, janǵa jaǵymsyz, mazmun-maǵynadan jurdaı jelókpe ánder keńinen óris alyp, qazaqqa tán baılsaldyǵymyz kórer kózge joǵalyp barady. Kıim kııý mádenıetimiz ózgerip, ımandylyq ádebin saqtamaıtyn boldyq. Qyzdardan qytyq, ádeptilik pen ıbalyq qasıet ketip barady.
Qysqasy, Qazaqstannyń jańǵyrýy – ol birinshi kezekte ózimizdiń baıyrǵy ulttyq naqyshymyzdy saqtap qalýdan turatynyn umytpaǵanymyz jón. Mine, osy jáne ózge de ózekti máselelerdi júzege asyrýdy qolǵa alsa, babalar amanatyna adaldyq tanytýdy Amanat partııasy óziniń basty mindeti etip alsa, onda ol qazaq halqynyń shynaıy qoldaýy ıe bola alady.
Serikbaı TURJAN,
Báıdibek aýdanynyń qurmetti azamaty
Túrkistan oblysy