Qyzylorda oblysy Qurylys, sáýlet jáne qala qurylysy basqarmasy basshysynyń orynbasary bıýdjet qarajatyn jymqyrǵany úshin qamaýǵa alyndy, dep habarlaıdy Egemen.kz.
Bul týraly Sybaılas jemqorlyqqa qarsy is-qımyl agenttiginiń Qyzylorda oblysyndaǵy departamentiniń baspasóz qyzmetiniń ókili málimdedi.
«Oblystyq sybaılas jemqorlyqqa qarsy qyzmet «Qyzylorda oblysynyń qurylys, sáýlet jáne qala qurylysy basqarmasy" MM basshysynyń orynbasaryna qatysty 2021 jyly aıaqtalmaǵan qurylys nysanyn zańsyz qabyldaý arqyly 14,5 mıllıon teńge kóleminde bıýdjet qarajatyn jymqyrǵan degen aıyp boıynsha tergeý júrgizip jatyr», dedi vedomstvo ókili.
Tergeý soty kúdiktige qatysty kúzetpen ustaý túrindegi bultartpaý sharasyn tańdady.
«Tergeý múddesine baılanysty basqa aqparat jarııalanbaıdy», dep atap ótti Sybaılas jemqorlyqqa qarsy qyzmet agenttigi ókili.