Bas prokýror, eń aldymen, qańtar oqıǵasynyń birinshi kezeńinde polısııa qyzmetkerleriniń, áskerdiń jaýyngerlik qarý qoldanbaýynyń sebebi sekildi mańyzdy máselege nazar aýdardy.
Tek jaǵdaı terrorlyq jáne asa qaýipti qylmystyq sıpat alǵanda, órteý, adam ómirine qaýip tóndirip, múlikke zalal keltirip, áleýmettik qaýip týdyrǵanda qarý qoldanýǵa zańdy jáne quqyqtyq negiz paıda boldy.
Qańtar oqıǵasy úsh kezeńge bólingeni aıtyldy: Birinshiden, oqıǵa beıbit sherýmen bastalǵan, keıin bul tolqýlar qarýly ekstremısterdiń kelýimen radıkaldy sıpat alyp, sońynda topqa krımınal qosylyp ahýal ýshyǵyp ketken. Uıymdastyrýshylardyń túpki maqsaty eldegi bılikti kúshpen basyp alý boldy.
Baıandamada Bas prokýratýranyń arnaıy prokýrorlary basqaratyn vedomstvoaralyq jedel-tergeý toptary qurǵan qylmystyq ister boıynsha is júrgizý jumystary keltirgen statıstıkasy mańyzdy oryn aldy.
Bul qaıǵyly jaǵdaı oǵan qatysy joq adamdarǵa, jazyqsyz jandarǵa da áser etti: atys kezinde 20 adam kezdeısoq qaza boldy. Onyń 11-i – Almaty qalasynda, 8-i – Almaty oblysynda, bireýi – Tarazda. Bul ulttyq qasirettiń qorytyndysyn el sottary shyǵara jatar, al biz oqıǵanyń bolashaqta qaıtalanbaýy úshin onyń saldaryna oralyp otyratynymyz anyq.
Marat QOǴAMOV,
zań ǵylymdarynyń doktory, professor