«Qazaqstan Respýblıkasynyń Sáýletshiler odaǵy» qoǵamdyq birlestigi Almaty qalasynda ótken XVII Seziniń qorytyndysyn jarııalady, dep habarlaıdy Egemen.kz.
Jıyn barysynda elimizdegi sáýlet ındýstrııasyn damytýdyń basty máseleleri talqylanǵan.
Is-sharaǵa Sáýletshiler odaǵynyń fılıaldary men bastaýysh uıymdarynan 90 delegat qatysty.
Sezd kezinde birlestiktiń jańa basqarýshy quramy saılanǵan. Odaqtyń basshysy laýazymyna professor, Halyqaralyq Sáýlet akademııasynyń korrespondent múshesi, Qazaqstannyń Qurmetti qurylysshysy, KSRO jáne Qazaqstan Sáýletshiler odaǵynyń múshesi Serik Sultanǵalı taǵaıyndaldy.
Odaqtyń jańa vıse-prezıdentteri bolyp qurmetti qurylysshylar Aıdar Tatyǵulov pen Ǵabıt Sadyrbaev saılandy.Sonymen qatar, tekserý komıssııasynyń quramyna Vladımır Sıdorov, Erjan Ahmetov, Qalbı Qoshqarbaev, Tóletaı Jarylǵanov kirdi.
Basqosýda Qazaqstan arhıtektýrasynyń qazirgi zamanǵy kezeńi men bolashaq damýynyń ózekti máselelerin qozǵaǵan birneshe baıandama tyńdaldy.
«Buryn bizdiń elimizde qala qurylysy keńesi jumys istegen. Kez kelgen ǵımarattyń qurylysyn kólemine qaramastan, Qazaqstan Sáýletshiler odaǵy janyndaǵy sáýlet qoǵamdastyǵy árqashan qarastyratyn. Odaqtyń jas músheleri kóp ekenin eskere otyryp, barlyq jańa tehnologııalar odaqtyń baqylaýynda ekenin aıtqym keledi. Azamattar narazy bolatyn haotıkalyq jáne tyǵyz qurylysqa jol berilmeýi kerek. Biz qala qurylysy keńesiniń sheshimderi men usynystaryna qol jetkizemiz jáne oǵan súıenemiz», dedi Sáýletshiler odaǵynyń prezıdenti Serik Sultanǵalı.
Aıta ketsek, Qazaqstan Sáýletshiler odaǵy 1936 jyldan beri uzaq jáne jemisti damý jolynan ótti. 1992 jyly burynǵy KSRO Sáýletshiler odaǵynyń respýblıkalyq uıymy derbestikke ıe bolyp, «Qazaqstan Respýblıkasy Sáýletshiler odaǵy» dep atala bastady. Osy kezeńde odaq TMD Sáýletshiler odaqtarynyń halyqaralyq qaýymdastyǵynyń (IASA) quryltaıshylarynyń biri boldy. Sonymen qatar Halyqaralyq Sáýletshiler odaǵynyń teń quqyly múshesi.