Ulystyń uly kúni – Naýryz merekesi qarsańynda jyl kóleminde eńbegimen kózge túsken BAQ ókilderi QR Jýrnalıster Odaǵynyń Shyǵys Qazaqstan oblystyq fılıaly atynan marapatqa ıe boldy, dep habarlaıdy Egemen.kz.
Bul kúni alǵys arqalaǵan jýrnalısterdiń oblystaǵy BAQ salasyna qosyp kele jatqan úlesteri zor. Atap aıtsaq, oblystyq «Didar» gazetiniń bas redaktory Ýálıhan Toqpataev óńir jýrnalıstıkasyn damytýdaǵy san jylǵy eńbegi Jýrnalıster Odaǵy tarapynan baǵalanyp, alǵys hatpen marapattady. Al, óńir jýrnalıstıkasyn damytýǵa qosqan úlesi úshin oblystyq «Meniń ólkem» gazetiniń dırektory Erbolat Muqajanov, óńirdegi ózekti máselelerdi batyl kótergeni úshin respýblıkalyq «Kazahstanskaıa pravda» gazetiniń Shyǵys Qazaqstan oblysyndaǵy menshikti tilshisi Galına Vologodskaıa marapattalady.
Jýrnalıster Odaǵynyń ShQO-daǵy fılıaly zeınettegi tilshilerdi de umyt qaldyrmady. San jylǵy eńbegi úshin oblystyq «Rýdnyı Altaı» gazetiniń ardageri Qabdýlqaıyr Qudaıbergenovke alǵys hat tabystaldy. Ol orys tilinde qazaq tiliniń máselesin san márte qaýzaǵany oqyrmandardyń esinde.
– Sharanyń maqsaty – kún men tún teńeletin áz Naýryz merekesi qarsańynda óńirdegi ózekti máselelerdi batyl kóterip júrgen áriptesterimizdiń eńbegin elep-eskerý. Aǵa býyn ókilderine iltıpat tanytý, urpaqtar sabaqtastyǵyn jalǵastyrý. Máselen, osy shara aıasynda oblystyq «Rýdnyı Altaı» gazetinde uzaq jyl qyzmet atqarǵan, qazaqtyń máselesin orys tilinde jetkizgen, qazir densaýlyq jaǵdaıyna baılanysty úıde otyrǵan Qabdylqaıyr Qudaıbergenovke qurmet kórsettik. Oblystyq «Dıdar» gazetinde 40 jyyldan astam eńbek etip júrgen Ýálıhan Toqpataevqa alǵys aıttyq. Mundaı aıtary bar, jazary bar ardager jýrnalısterdi qalam ustaǵan jas býyn ókilderi bilýi tıis, – deıdi QR Jýrnalıster odaǵynyń ShQO fılıalynyń jetekshisi Azamat Qasym.
Sonymen qatar, «Habar-24» telearnasynyń Shyǵys Qazaqstandaǵy menshikti tilshisi Elmıra Ahmetova, «QAZAQSTAN» ulttyq arnasynyń Semeıdegi menshikti tilshisi Erjan Jaqyp, «Atameken Business» telearnasynyń oblystaǵy menshikti tilshisi Janbolat Sanııaz, oblystyq «Ertis óńiri» gazetiniń bas redaktory Sátjan Káripbaev, respýblıkalyq «Egemen Qazaqstan» gazetiniń Shyǵys Qazaqstan oblysyndaǵy menshikti tilshisi Mereı Qaınaruly,oblystyq «Altai» telearnasynyń redaktory Anna Kosareva, Kókpekti aýdandyq «Juldyz» gazetiniń redaktory Darhan Berdibek marapattalady.
Jıyn sońynda QR Jýrnalıster Odaǵynyń ShQO fılıaly dırektory Azamat Qasym tilshiler atynan atalǵan sharaǵa demeýshilik kórsetken «Kazsınk» kompanııasynyń ákimshilik máseleler jónindegi atqarýshy dırektory Andreı Lazarevke, jáne Aıagóz, Ulan, Katonqaraǵaı, Besqaraǵaı, Kókpekti aýdandarynyń ákimderine jáne kásipker, belgili restorator Muhtar Toııbazarovqa alǵys bildirdi.