Aqmola oblysynyń kórkem qoınaýynda sporttyq baǵdarlaý boıynsha “Býrabaı – 2010” halyqaralyq jarys márege jetti. Qazaqstan men Reseıdiń tańdaýly sportshylary qatysqan dástúrli básekeni “Nur Otan” HDP fılıaly uıymdastyrdy.
Bes kúnge sozylǵan baıraqty básekede el oblystarynan jáne Reseı Federasııasynyń Sibir, Oral, Altaı ólkesinen 10 jas pen 60 jas aralyǵyndaǵy 165 sportshy baq synasty.
Jarystyń ashylý rásiminde “Nur Otan” partııasy ortalyq apparatynyń bas sarapshysy, Qazaqstan Respýblıkasy Sporttyq baǵdarlaý federasııasynyń prezıdenti Vladımır Telnov jurtshylyqty quttyqtaı kelip, sporttyń bul túri 2011 jylǵy VII Azııa oıyndarynyń baǵdarlamasyna engizilgendikten, onyń mańyzy eselep artqandyǵyn jetkizdi.
“Nur Otan” HDP Aqmola oblystyq fılıaly tóraǵasynyń orynbasary Ǵalym Shoıkın dástúrli jarystyń buqaralyq sıpat alyp otyrǵanyn, onyń salamatty ómir saltyn qalyptastyrýdaǵy, jastar tárbıesindegi mańyzdy ornyn atap ótti.
– Sporttyń bul túri Qazaqstan men Reseıde meılinshe damyp otyr, – dedi Ǵalym Nurmaǵambetuly. – TMD elderi arasynda kósh basynda turǵan sportshylarymyz halyqaralyq dodalarda da joǵary tabystarǵa jetip júr. Memleket basshysynyń sportty damytý saıasatyn qoldaǵan “Nur Otan” partııasy kóptegen ıgi isterdiń uıytqysy bolyp otyr. Búgingi halyqaralyq deńgeıdegi jarys aldaǵy Azııa oıyndarynyń daıyndyq sheńberinde ótkizilýde. Sondyqtan, jaýapkershilik te joǵary bolmaq. Synnan súrinbeı ótýlerińizge tilektestik bildiremiz.
Tartysty jarystyń jeńimpazdary tórt start qorytyndysymen anyqtaldy. Áıelder arasynda Astana qalasynyń ókili, halyqaralyq dárejedegi sport sheberi Olga Novıkovanyń mereıi ústem boldy. Osy jerde Olganyń sprıntti júgirýde álem kýbogynyń qatarynan tórt kezeńiniń jeńimpazy ekendigin eske salǵymyz keledi. Soltústik Qazaqstan oblysynyń sportshysy Natalıa Chýprıkova ekinshi, Tom qalasynyń stýdenti Galına Bragına úshinshi oryndy enshiledi.
Almatylyq Denıs Vlasov Býrabaıǵa Japonııadaǵy kópkúndik básekeden “teri de qatpaı” kelgenine qaramastan, birinshi oryndy jeńip alyp, “Nur Otan” HDP kýbogyn ıemdendi. Japonııada Qazaqstan quramasy estafetalyq jarysta júldeli úshinshi orynǵa kóterilgen edi. Reseılik sańlaq sportshylar Alekseı Rıazanov pen Aleksandr Zelensov marapat tuǵyrynyń ekinshi jáne úshinshi satysyna kóterildi.
Sondaı-aq, Anton Zemel, Natalıa Tashkına, Anton Nakatkov, Ásem Nazyrova, Bınalı Osmanov jetekshi partııanyń júldelerin ıelendi.
Baqbergen AMALBEK,
Aqmola oblysy.
ÁZIRShE SÁTSIZ OINAÝDAMYZ
Germanııada shaıbaly hokkeıden álem chempıonaty ótip jatyr. Oǵan Andreı Shaıanov jattyqtyratyn elimizdiń bas qurama komandasy da qatysýda.
Bizdiń komanda “A” tobynda baq synasýda. Dúbirli dodanyń kúntizbesine sáıkes, Qazaqstan qurama komandasy alǵashqy oıynyn mamyrdyń 9-ynda Belarýs quramasymen ótkizdi. Odan keıin mamyrdyń 11-inde Reseı hokkeıshilerimen kezdesip, mamyrdyń 13-inde slovakııalyqtarmen baq synasty.
О́kinishke qaraı, elimizdiń ulttyq qurama komandasy alǵashqy kezdesýinde Belarýs quramasynan 5:2 esebimen jeńilip qaldy. Al Reseı quramasy óziniń birinshi kezdesýinde Slovakııadan 3:1 esebimen basym túsken bolatyn. Bizdiń ulttyq qurama komandamyz Belarýs, Slovakııa jáne Reseı komandalary kiretin “A” tobynda óner kórsetýde.
Qazaqstandyq hokkeıshiler mamyrdyń 11-i kúni ótken kezekti oıynynda Reseıdiń quramasynan 1:4 esebimen utyldy. Oıynnyń 11-shi mınýtynda esepti Reseı qurama komandasynyń tanymal shabýylshysy Aleksandr Ovechkın ashty. Oıynnyń ekinshi kezeńinde, atap aıtqanda 21-shi mınýtynda Ilıa Kovalchýk, 38-shi mınýtynda Aleksandr Semın Qazaqstan quramasynyń qaqpashysy Vıtalıı Eremeevti qapy qaldyrdy. Al oıynnyń aıaqtalýyna 15 mınýt qalǵanda Reseı komandasynyń qorǵaýshysy Denıs Grebeshkov qazaqstandyqtar qaqpasyna tórtinshi shaıbany soqty.
Qazaqstandyqtar bolsa, oıynnyń aıaqtalýyna nebári birneshe sekýnd qalǵanda jalǵyz shaıbamen esepti sál qysqarta aldy. Onyń avtory – Dmıtrıı Dýdarev.
Burnaǵy kúni Shveısarııa quramasymen taıaq túıistirgen qazaqstandyqtar taǵy jeńildi. Esep – 5:1.
Jandos MEDIMANOV.