Jańashyldyq bastaýy

Prezıdent qańtar oqıǵasyna baǵa berip, «Osy kúnderde jurty­myz Táýelsizdiktiń qadir-qasıetin jan-júregimen sezindi. Tatýlyq pen turaqtylyq, tynyshtyq pen beıbitshilik qanshalyqty mańyzdy ekenin jete túsindi. Biz myzǵymas birliktiń arqasynda memleketimizdi qorǵap qaldyq», deı kele, jazyq­syz qaza bolǵandardyń otbasylaryna taǵy da kóńil aıtty.

Joldaýda on naqty másele aı­tyldy, olar: Prezıdenttiń óki­let­tiligi, ókildi bılik tarmaǵyn qaı­ta qurý, saılaý júıesin jetil­dirý, partııalyq júıeni damytý múm­kindikterin keńeıtý, saılaý úde­risin jańǵyrtý, quqyq qor­ǵaý ıns­tıtýttaryn kúsheıtý, bu­qa­ra­­lyq aqparat quraldarynyń bá­se­­kege qabiletin arttyrý jáne aza­mat­tyq qoǵam ınstıtýttarynyń ró­lin ny­ǵaıtý, elimizdiń ákimshi­lik-aýmaq­­tyq qurylymyn jetil­dirý, jer­­gilikti ózin ózi basqarýdy ortalyq­syz­dandyrý, daǵdarysqa qarsy sharalar.

Elimizde áleýmettik-ekono­mı­kalyq ba­ǵyt­taǵy ózgerister, demogra­fııa­lyq ahýal­dyń jaqsarýy jáne halyqtyń talap-tilegine jaýap berý maq­satynda Prezıdent Abaı, Ulytaý jáne Jetisý oblys­taryn qurýdy usyndy. Almaty oblysynyń ortalyǵy Qapshaǵaıda bolýy kerek deı kele, Memleket basshysy Qapshaǵaıǵa Dinmuhamed Qonaevtyń esimin berý týraly usynysyn jetkizdi.

Bul ózgerister ekonomıkalyq qana emes, rýhanı jaǵynan da mańyzdy sheshim ekenin aıta kele, «Jańadan qurylatyn oblystar­dyń Abaı, Ulytaý, Jetisý dep atalýynda erekshe mán bar. Biz ulan­-ǵaıyr jerimizdiń baıyrǵy ataýlaryn, uly tulǵalarymyzdyń esimin urpaq sanasynda jańǵyrta beremiz», dedi.

Memleket basshysy Qazaq­standy damytýdyń saıası modelin ózgertý úshin, eń aldymen, bas­qarýdyń sýperprezıdenttik úlgisinen kúshti Parlamenti bar prezıdenttik respýblıkaǵa birjola kóshý týraly aıtyp, Parlamenttiń rólin kúsheıtý arqyly Jańa Qazaqstandy azamattyq qoǵamy qalyptasqan tıimdi memleketke aınaldyrý úshin «Kúshti Prezıdent – yqpaldy Parlament – esep beretin Úkimet» qaǵıdatyn basshylyqqa alý qajettigin basa aıtty.

Ári qaraı azamattardyń ókildi bılikke degen senimin nyǵaıtý úshin máslıhattarǵa basa mán berý qajettigin, bul rette olardyń rólin arttyryp, derbestigin qamtamasyz etý úshin máslıhat tóraǵasy laýazymyn engizý, yqpalyn barynsha kú­sheıtý úshin oblys ákimderin ta­ǵaıyndaý tártibin ózgertý qa­jet­tigin atap ótti. Sondaı-aq Pre­zı­dent «myqty máslıhattar ózekti máselelerdiń sheshimin tabýǵa jáne aımaqtardaǵy turmys sapasyn jaq­sartýǵa áser ete alady», dedi.

Saılaý júıesin jetildirýge qa­tys­ty Parlament palata­la­ryn­daǵy kvota sanyna ózge­ris en­gizý jáne Májilistiń depý­tat­tyq kor­pýsynyń 70 paıyzyn pro­por­sıo­naldyq, 30 paıyzyn majo­rı­tar­lyq tásilmen jasaqtaýdy, ara­l­as saılaý úlgisin oblystar men res­pýb­lıkalyq mańyzy bar qala­lar­daǵy máslıhattar saılaýy­na da eng­izýdi usyndy. Bul qadam – par­tııalardyń Májilis pen más­lı­hatqa ótý shegin tómendetý úshin osy­ǵan deıin qabyldan­ǵan she­shim­niń zańdy jalǵasy deı ke­le, pro­­por­sıonaldy-majorıtarly úl­­gi­­de saılaýshylardyń múddesi ult­tyq jáne óńirlik deńgeıde tolyq kórinis tabatynyna senim bildirdi.

Máslıhattarǵa qatysty kelesi jańashyldyq retinde saıası jańǵyrý aıasynda máslıhattar jergilikti ózin ózi basqarýdyń negizgi býynyna aınalýǵa tıis ekendigin aıtyp, máslıhattardyń ókilettigin naq­ty belgileýge tapsyrma berdi. Bul ja­ńa­­shyldyqtardyń bári parlamenttik mádenıeti joǵary jáne yqpaldy halyq qalaýlylary bar Jańa Qazaqstandy qurýǵa baǵyttalǵan.

Memleket basshysy Q.Toqaev Joldaýdyń sońynda «Bizge eshkim syrttan kelip, eshteńe jasap bermeıtini anyq, bári óz qolymyzda. Sondyqtan, barshańyzdy Jańa Qazaqstandy qurýǵa bir kisideı jumylýǵa shaqyramyn. Halyqtyń qoldaýymen maqsatymyzǵa jetemiz dep senemin» dep, Qazaqstan halqyna senim artty.

Mıra BALTYMOVA,

Aqtóbe qalalyq máslıhatynyń depýtaty

AQTО́BE