«Medısınalyq saqtandyrý qorynyń Nur-Sultan qalasy boıynsha qyzmet jetkizýshileriniń biri – №2 kópbeıindi qalalyq aýrýhana. Aýrýhananyń Shuǵyl kardıologııa jáne kardıohırýrgııa ortalyǵynda MÁMS aıasynda pasıentterge qymbat otalar kúndelikti júrgiziledi. Bul joly aorta qatparlanýy bar júrekke kúrdeli qaıtalama ota jasaldy», dep habarlady «Áleýmettik medısınalyq saqtandyrý qory» KeAQ Nur-Sultan qalasy boıynsha fılıalynyń baspasóz qyzmeti.
Ota aorta doǵasyn qaıta jańartýdyń ekinshi kezeńin júrgizý úshin jasaldy, túzetýdiń birinshi kezeńi Bental de Bono operasııasy shamamen eki aı buryn jasaldy.
«Biz aorta doǵasynda aorta doǵasyn protezdeý jáne aorta doǵasynyń barlyq butaqtaryn aortanyń kóterilgen bóliginiń protezine qosý arqyly qaıta jańartý otasyn jasadyq. Aorta doǵasyndaǵy ota kezinde standartty jasandy qan aınalymynan basqa, mıdy qorǵaýdy qamtamasyz etý qajet. О́z kezeginde júrek-qantamyr hırýrgııasynda mıdy qorǵaý óz aldyna bólek kóp komponentti problema bolyp sanalady. Bul jaǵdaı otanyń ózin edáýir qıyndatady, nevrologııalyq jáne basqa da asqynýlardyń paıda bolý qaýpin arttyrady. Ota qan joǵaltpaı, asqynýsyz, sátti ótti. Naýqas ekinshi kúni reanımasııadan bólimshege aýystyryldy», dedi júrek-qantamyr hırýrgııasy bólimshesiniń meńgerýshisi Alekseı Smolenskıı.
Aıta keteıik, eger pasıent MÁMS júıesinde saqtandyrylmaǵan bolsa, bul ota 2,5 mln teńgeni quraıdy.
Qazirgi ýaqytta pasıent Iý.K. ózin jaqsy sezinedi jáne dárigerlerge alǵys aıtty: «MÁMS júıesi arqyly osyndaı joǵary tehnologııalyq qyzmetter maǵan tegin kórsetildi. Ota óte kúrdeli boldy, óte jaqsy júrgizildi. Qazir óz qalpyma jyldam kelýdemin, №2 kópbeıindi qalalyq aýrýhana dárigerlerine qamqorlyqtary men kásibı biliktilikteri úshin alǵys aıtqym keledi».
Dárigerler táýekel etken erekshe ota sátti ótip, naýqas jaǵdaıynyń durystala bastaǵanyna qýanyshty.