Siz oılaǵannan bólek, biz oılaǵannan bıik oıdyń jelisimen ómirge kelgen týyndyny jas talant qabiletiniń shyńy desek bolatyndaı. Adam qoǵamnyń ıleýinde ósetinin eskersek, qylqalam ıesiniń ádetki túsinikten ózgeshe qadamǵa barýy qaıran qaldyrady. Tipti ónertanýshylardyń ózi oń baǵasyn berip, sýretkerlik qyryna senim bildiripti. Bul ystyq pikirler sýretshiniń shyǵarmasyna úńilýimizge sep boldy.
Kartına taqyrybynan-aq shyǵarmanyń ishki kompozısııasynyń beder-bıigine ári mán-mazmunyna qanyǵýǵa bolady. Jas sýretshi Dýlat Úsenbaevtyń «8-shi shaǵyn aýdan» týyndysy bulyńǵyr tústeı oıdyń sharpysýynan jazylǵandaı. Ony ózi de jasyrmaıdy.
Jalpy, onyń keskindemesindegi basty eki janr – peızaj jáne natıýrmort. Sebebi mastıhınmen jumys isteıtin, ózindik máneri qalyptasqan sýretshi jalpaq jaǵyndy keskindemede tús pen formany qarastyrady. Iаǵnı tús arqyly forma quraıdy. Avtordyń jumystary oılanyp-tolǵanýǵa shaqyrady.
Máselen, Almaty qalasyna arnalǵan peızaj toptamalarynda ekspressııaǵa toly boıaý jaǵystary adamnyń júrek qaǵysyn jyldamdata túsip, erekshe kóńil kúıge jeteleıdi. Bul qalalyq peızajdardyń basym bóligi qarańǵy da kúńgirt tústermen jazylǵan tas qabyrǵaly sýyq ǵımarattar, bos kósheler, shaǵyn úıler barlyǵy adam balasyna esh jylýlyq, jaılylyq syılamaıtyn keńistik retinde aıqyndalǵan. Mine, budan biz úlken qalada adasqan adamnyń kózqarasyn tanımyz. Sýretshi muny tikeleı ashyp kórsetpese de, ishki túısiginiń nátıjesinde kórinis taýyp tur.
Avtor týyndylarynyń syrtqy kórinisteriniń túrliligine qaramastan, emosıonaldyq kúıimen erekshelene túsedi. Jas sýretshiniń shyǵarmashylyǵy tek ónerimizdiń odan ári damýyndaǵy bastaý emes, sonymen qatar búgingi kúngi halqymyzdyń rýhanı qundylyqtaryn qalyptastyrýdaǵy ıdeıalyq-estetıkalyq belsendi kúsh bolyp tabylatynyn eskergenimiz jón.