Petropavl ákimi Bolat Jumabekov Soltústik Qazaqstan oblysynyń ortalyǵyn Qyzyljar dep ataý usynylǵan petısııaǵa qatysty pikir bildirdi, dep habarlaıdy Egemen.kz.
Petısııa egov.press saıtynda jarııalandy.
Qazirge deıin ony 25 myńnan astam adam qoldaǵan, 14 myń adam qarsy bolǵan. Soǵan baılanysty qala ákimi Bolat Jumabekov áleýmettik jelidegi paraqshasynda Petropavl qalasynyń ataýyn ózgertý týraly onlaın-petısııany jaqtaýshylar men qarsy adamdar arasynda pikirtalas júrip jatqanyn jazdy.«Bul petısııany jeke tulǵa memlekettik emes saıtta jasaǵanyn atap ótkim keledi. Memlekettik organdardyń bul bastamaǵa eshqandaı qatysy joq. Qala ákimdiginiń kún tártibinde qalany qaıta ataý týraly másele kóterilmegenin resmı túrde málimdeımin. Bul másele týyndaǵan jaǵdaıda da, ol bizdiń qalamyzda turatyn halyqtyń pikirin eskerip, eldiń onomastıka salasyndaǵy qoldanystaǵy zańnamasyna sáıkes júrgiziledi», dedi qala ákimi.
Sol sebepti ol azamattardy ózara qurmet kórsetýge jáne áleýmettik jelide pikir jazý barysynda jaýapkershilikti umytpaýǵa shaqyrdy.
«El prezıdenti Qazaqstan halqyna joldaýynda «Jańa Qazaqstanda biz árdaıym «ár túrli kózqaras, biraq birtutas ult» qaǵıdatyn ustanýymyz qajet» dep aıtqan bolatyn. Bizdiń qalamyzdyń turǵyndary Prezıdentpen birdeı pikirdi ustanyp jáne biz bir-birine joǵary mádenıet tanytatynyna senimdimin», dep túıindedi ol.