Úkimetke eki aıdyń ishinde óz apparatynyń, ortalyq jáne jergilikti atqarýshy organdar janyndaǵy konsýltatıvtik-keńesshi organdardyń sanyn eki ese qysqartý júkteldi, dep habarlaıdy Egemen.kz.
Prezıdent búgin qol qoıǵan «Memlekettik apparattyń qyzmetin bıýrokratııadan aryltý jónindegi sharalar týraly» Jarlyqta osyndaı tarmaq bar. «Úkimet, ortalyq jáne jergilikti atqarýshy organdar janyndaǵy konsýltatıvtik-keńesshi organdardyń sanyn eki ese qysqartýdy qamtamasyz etsin», dep jazylǵan qujatta.
Sondaı-aq Úkimetke osy eki aı ishinde azamattar men bıznes neǵurlym talap etetin ómirlik jáne iskerlik jaǵdaılardy qosyp, olardyń reınjınırıngi men avtomattandyrylýyn qamtamasyz etý, kórsetiletin memlekettik qyzmetter tizilimin qalyptastyrý tásilderin qaıta qaraý júktelip otyr.
«Azamattarmen kommýnıkasııa jáne vedomstvoaralyq jedel ózara is-qımyl jasaý maqsatynda ashyq keńester ótkizý úshin qoljetimdi onlaın-servısterdi paıdalaný múmkindigin qamtamasyz etsin», delingen Prezıdent Jarlyǵynda.