Uly qazaqtyń ushqan uıasyna qarasańyz ulan-ǵaıyr dalanyń bir pushpaǵyndaǵy qoıshy aýyly qol bulǵaıdy. Túıe minip tórt túligin túgendegen alash balasynyń atadan qalǵan amanaty osy – tuıaqty mal. Soǵan saı salt-dástúri de saralanyp, jańa óristeı jańǵyryp turady. Sol úrdistiń bir úzigi osy shyǵarmanyń altyn arqaýy sekildi. Jaılaýdaǵy shopannyń áni maıdaqońyr samal jelmen birge terbelip turǵandaı.
Qazaqtyń mańdaıyna bitken qylqalam sheberi Moldahmet Kenbaevtyń «Shopan áni» kartınasy aýyl balasynyń asqaq armanynyń shamshyraǵy ispetti. Naǵyz qazaqtyń bekzat bolmysyn, darqan dıdaryn, qoıý portretin shopannyń boıyna quıyp qoıǵandaı.
Bylaıǵy jurtqa beıtanys Moldahmet Kenbaev – qazaq dalasynyń naǵyz jyrshysyna aınalǵan sýretshilerdiń biri. Onyń kartınalarynda tabıǵat adammen, shopannyń eńbegimen tyǵyz baılanysty. Sodan da bolar peızajdyq kompozısııalarynyń janrlyq bastaýy solardan bastaý alady.
1954 jyly tyń jerlerdi ıgerý bastaldy. Joǵary kýrs stýdentteri Máskeýden tyń ıgerýge is-tájirıbege keldi. Olar Kókshetaý oblysyndaǵy Esil ózeniniń boıynda shatyrlarda turyp jatty. Dál osy jerde shopandardyń eńbegine arnalǵan kartına jazý ıdeıasy týady.
Shynynda «Shopan áni» onyń eń úzdik kartınalarynyń birine aınaldy. Kartına boz, josa, qońyr syndy názik tústermen jazylǵan. Bul samal jel terbetken jibekteı betegeli dalany anyq jetkizip tur. Kartınada tústerdiń barlyǵy óte tanys ári barynsha tabıǵı. Kókjıegi bıik, ushy-qıyry joq keń dalanyń tegistigi men tynyshtyǵyn esh nárse buza almaıdy. Tek túıe mingen shopannyń tulǵasy men jaıylyp júrgen qoılar ǵana osy fonda erekshelenip tur. Ol týǵan jerdiń sulýlyǵyn jyrlaıdy. Ol – osy sheksiz uly dalanyń qojaıyny, sondyqtan keń dalaǵa tákapparlyqpen qarap tur.
Atalǵan shyǵarmada únsiz úılesim bar, adamzattyń tabıǵatpen baılanysy sýretshi úshin mańyzdy sanat retinde ashylǵan. Ásirese jaılaýdaǵy qazaqtyń qońyr kelbeti men keńpeıil minezin ádemi úılestirgen.