Nur-Sultan qalasynda 6 jáne 8 jolaqty joldardyń qıylystaryndaǵy baǵdarshamdarǵa «bárine ortaq qyzyl tús» engizilip jatyr, dep habarlaıdy Egemen.kz.
Maqsaty – qıylysta baǵdarshamnyń «jasyl» tústi kútip turǵan qozǵalysqa qatysýshylardyń bári úshin bir mezette 1 sekýndtyq úzilis usyný. Mamandardyń aıtýynsha kúrdeli qıylystarda osyndaı úzilistiń bolýy kólik apattarynyń yqtımaldyǵyn azaıtyp otyr.
«Eń alǵash bul jańashyldyq Bógenbeı batyr-Respýblıka qıylysynda engizildi. Taldaýǵa súıensek, atalǵan rejım baǵdarshamdarǵa engizilgenge deıin atalǵan qıylysta 17 jol-kólik oqıǵasy tirkeldi. Al rejım iske qosylǵannan keıin munda eshqandaı jol-kólik oqıǵasy tirkelgen joq», deıdi qalalyq polısııa departamenti ákimshilik polısııa basqarmasynyń bastyǵy Eljan Chýpekov.
Aıtýynsha, byltyr «daıyndyq» rejımi 12 ýchaskege engizilgen. Al 2022 jyldyń basynan beri 10 ýchaskede osyndaı rejım qoldanyla bastaǵan.
Atap aıtsaq, qazir mundaı rejım Bógenbaı-Respýblıka qıylystarynan bólek, Jeńis dańǵyly men Kenesary, Máskeý, Moldaǵulova, Altynsarın, Esenberlın kósheleriniń qıylysynda, Momyshuly kóshesi men Sátpaev, Jumabaev kósheleriniń, Uly Dala kóshesi men Saýran, Aqmeshit kósheleriniń qıylysynda jumys istep tur.