Qazir Pavlodar qalasynyń bıligi shybyn-shirkeıdiń máselesimen álek. Shalys bassa, turǵyndardyń nalasyna ushyraıtynyn jaqsy túsinedi. Bastan ótken soń barynsha qamdanyp júr. Bul – mezgil máselesi. Shaharda odan da mańyzdy problemalar az emes. Jylý qubyrlarynyń tozýy, jolǵa asfalt tóseý sııaqty kommýnaldyq baǵyttaǵy jumystar shashetekten. Sáıkesinshe, shaǵym da kóp.
Basshylar júıkesin taýysady, basqa jumysqa aýysady. Másele sol kúıinde qala beredi. Tipti jyl saıyn ýshyǵa túsýde. Kósheden kez kelgen pavlodarlyqty toqtatyp, «shaharda qandaı problema bar?» dep surasańyz, kommýnaldyq sala týraly saıraı jóneletinine kúmánimiz joq.
Budan habardar oblys basshylyǵy jýyqta Pavlodar qalasyn damytý jóninde úlken jıyn ótkizdi. Oǵan burynǵy shahar basshylary arnaıy shaqyrylyp, ardagerlerdiń usynys-tilekteri nazarǵa alyndy. Pavlodar qalasynyń ákimi Asaıyn Baıhanovtyń aıtýynsha, oblys ortalyǵyndaǵy 610 aýlanyń 83 paıyzyn, ıaǵnı 504 aýlany jańartý qajet. Árıne, onyń barlyǵyn bir jyl ishinde jańartý múmkin emes. Sondyqtan jergilikti bılik bıyl ázirge 150 aýlada balalardyń oıyn jáne sport alańdaryn ornatý, asfalt jabyndysyn aýystyrý, oryndyqtar qoıý, kólik turaqtaryn qarastyrý sııaqty sharýalardy tyndyrmaq. Budan bólek, 55 vorkaýt alańdary men kóshe trenajerlary ornatylady dep josparlanýda. Pavlodarlyqtar jaryq máselesin jıi kóteredi. Búginde 164 aýla tasqarańǵy kúıde eken. 10 kósheniń boıynda jaryq jelileri múldem joq. Osy rette, shahar basshylyǵy jyl sońyna deıin qosymsha 2 250-den astam tirek baǵandary men shamdar qoıylatynyna sendirýde. Jalpy, shahardyń ınfraqurylymyn jańǵyrtýǵa oblystyq bıýdjetten 14 mlrd teńge, respýblıkalyq qazynadan 2 mlrd teńge qarajat qarastyrylmaq. Az aqsha emes, árıne. Oblys basshylyǵy endigi jerde mundaı qomaqty qarjyny tıimdi paıdalaný kerek ekenin eskertti.
Búginde oblys ortalyǵyndaǵy joldardyń 24 paıyzynyń sapasy syn kótermeıdi. Jaıaý júrginshilerge arnalǵan joldar eski tehnologııamen retke keltiriledi. Bıyl 12 kóshedegi 25 shaqyrymnan astam joldy qalpyna keltirý úshin 13 mlrd teńge jumsalmaq. Buǵan deıin jeke sektordaǵy 174 kóshede múlde jol bolmaǵan edi. О́tken jyly onyń 20-syna asfalt tóselipti. Bıyl taǵy 53 kóshede jańa jol jabyndysy paıda bolmaq.
Damý jospary talqylanǵan jıynǵa qatysqan qoǵamdyq keńes músheleri de usynys-pikirlerin ortaǵa saldy. Balalardy ońaltý ortalyqtaryn kóbeıtý, qoǵamdyq dárethanalar ashý, qurylys sapasyn jaqsartýǵa qatysty talap-tilekter aıtyldy.
PAVLODAR