Topyraqtyń qunaryn arttyryp, aýany tazartatyn, jazda saıa, qysta qamsaý bolatyn kókjelektiń qasıeti kóktemnen bastap bilinedi. Kóktemdegi ıgi dástúr, qaıyrly istiń biri – tal egip, aǵash otyrǵyzý. Burynnan da kórikti jerdi kógaldandyra túsirý maqsatymen jaqynda «Qazaqfılm» kınostýdııasynyń aýmaǵyna elimizdiń belgili kınogerleri aǵash otyrǵyzyp, saýapty is jasady.
Is-sharanyń ashylý saltanatynda Sh.Aımanov atyndaǵy «Qazaqfılm» AQ prezıdenti Aqan Sataev, «Ulttyq kınony qoldaý memlekettik ortalyǵy» KeAQ tóraǵasy Esetjan Qosybaev jáne qazaq kınosynyń ardageri, kınostýdııanyń kórkemdik jetekshisi Asanáli Áshimov sóz sóıledi. О́z sózinde Aqan Sataev qazaqstandyq kınogerlerdi biriktirýge baǵyttalǵan bul shara mindetti túrde jalǵasyn tabatynyn aıtty. Al Esetjan Qosybaev kınostýdııa basshylyǵyna alǵysyn bildirip, qazaq kınosynyń órken jaıa túsýine tilektestigin bildirdi.
Qazaq kınematografııasynyń damýyna óz úlesin qosyp kele jatqan rejısserler Dárejan О́mirbaev, Rústem Ábdirashev, Rashıd Nuǵymanov, Serik Apyrymov, Ádilhan Erjanov, Farhat Sharıpov, Ernar Nurǵalıev, Elıa Gılman, Serikbol О́tepbergenov, Qanat Beısekeev, akterler Merýert О́tekesheva, Erbolat Toǵyzaqov, Baıkenje Belbaev, Almıra Tursyn, Shyńǵys Kapın, Azamat Satybaldy, Ásel Saǵatova, Qarlyǵash Muhamedjanova, Tólepbergen Baısaqalov, Jan Baıjanbaev, Aıdos Bektemirov, Ánýar Nurpeıisov, Asqar Ilııasov jáne ózge de jas ártister stýdııa aýmaǵyna 80 túp aǵash otyrǵyzdy. Kıno maıtalmandary jelmen diril qaqqan jas shybyqtardyń kúni erteń japyraǵy jaıqalǵan dińi qatty, butaǵy mol, bıik báıterekterge aınalatynyna senim bildirip, toǵaıǵan kóńilmen tarqasty.
ALMATY