Nur-Sultan qalasy ákimdiginiń uıymdastyrýymen elordada qalalyq klınıkalar basshylary men beıindi basqarma basshylyǵynyń qatysýymen mańyzdy májilis ótti. Jıynnyń basty taqyryby – aldaǵy respýblıkalyq referendým. Is-shara barysynda qalalyq klınıkalar dırektorlarymen birge elimizdiń basty qujatyna ózgerister men tolyqtyrýlar engizý jónindegi referendýmnyń róli talqylandy.
Elordalyq qoǵamdyq densaýlyq saqtaý basqarmasynyń basshysy Tımýr Muratov Konstıtýsııalyq reformanyń negizgi baǵyttaryna toqtaldy.
«Bul shyn máninde jańa Qazaqstannyń qalyptasýyndaǵy basty saıası oqıǵa. Memleket basshysy Qasym-Jomart Toqaevtyń referendým ótkizý týraly sheshimi eldiń saıası ómirinde ǵana emes, qoǵamdyq ómirinde de mańyzdy. Referendým bizdiń azamattyq ustanymymyzdy nyǵaıtýǵa múmkindik beredi jáne eldegi qoǵamdyq-saıası jaǵdaıǵa jaǵymdy áser etedi. Medısınalyq qoǵamdastyqty aldaǵy saıası ózgerister máselesinde shette qalmaýǵa shaqyramyn», dedi ol.
Esterińizge sala keteıik, 5 maýsymda Qazaqstanda Konstıtýsııaǵa túzetýler boıynsha referendým ótedi. Ony ótkizý kezeńinde barlyq saılaý ýchaskeleri quramynda medısına qyzmetkerleri bar medısınalyq pýnktermen jaraqtandyrylatyn bolady. Osy kúni qala boıynsha barlyǵy 247 ashyq ýchaske jumysyn bastaıdy. Májiliste konstıtýsııalyq reformalardy talqylaýdan basqa, densaýlyq saqtaý júıesindegi aǵymdaǵy máselelerdi talqylandy, qalanyń medısınalyq uıymdarynyń, sonyń ishinde jekemenshik uıymdardyń jumysynyń negizgi baǵyttaryna toqtaldy. COVID-19-ǵa qarsy vaksınalaý máselesine erekshe nazar aýdaryldy. Buǵan deıin Densaýlyq saqtaý mınıstrligi koronavırýstyń jańa shtamdarynyń aınalymy týraly aıtqan bolatyn.
Densaýlyq saqtaý basqarmasynyń basshysy qala turǵyndaryn vaksınalaýǵa jáne densaýlyǵyna jaýapkershilikpen qaraýǵa shaqyrady. Búgingi kúni qala boıynsha 500 myńǵa jýyq turǵyn ımmýndaýdyń tolyq kýrsynan ótti, shamamen 128 myń adam qaıta vaksına aldy.