Sońǵy 3-4 kúnnen beri áleýmettik jelide Almaty qalasyndaǵy Balýan Sholaq atyndaǵy sport saraıynda bolǵan konserttiń aınalasynda týyndaǵan daý da, ashý da, halyqtyń talaby da tolastar emes. Qoǵamnyń qyzý talqysyna túsip, el aldynda júrgen keı azamattardyń yzasyn týǵyzǵany – «Irına Kaıratovna» degen top pen «Shıza» deıtin «ánshiniń» sahna tórinde Týdy ýmajdap turǵany, onysymen qoımaı sahnada turyp teksizdigin kórsetkeni edi.
Sanaýly kúnnen keıin Rámizder kúnin atap ótemiz. Al keshegi keleńsizdik jyl saıyn memlekettik turǵydan erekshe mán berilip ótkiziletin osy kúnniń mánin, ıdeologııalyq mańyzyn jastarymyzdyń sanasyna sińire almaǵanymyzdy kórsetpeı me?
Ertesi kúni el aldyna shyǵyp, keshirim surapty álgilerdiń biri. Alaıda ulttyń ary men uıatyn aıaqqa taptaý keshirim surap qutylyp ketetin ońaı is emes. О́ıtkeni Týdyń qorlanǵany keshiriletin is emes. Sahna tórine shyǵyp aýzyna kelgenderin aıtqandar tek eskertýimen qutylsa, mundaı jaǵdaı qaıtalana berýi ábden múmkin. Týdy mazaq etkender tutastaı eldi mazaq etkenin túsinýleri qajet. Al qalyń jurt jelikken jastardy ǵana emes, osy konsertke jaýapty memlekettik saıası laýazymdy tulǵalar men Almaty qalasynyń mádenı is-sharalaryna jaýapty sheneýnikterdi de jaýapkershilikke tartýdy talap etip otyr.
Senator Aıgúl Qapbarova eki jyl buryn ártisterdiń sahnadaǵy júris-turysy, ádebi, minez-qulqy, sahna tórinde ádepsiz sóz aıtý men fonogramma qoldanýyn retteıtin zań qabyldanǵanyn eske salyp ótti.
Senat depýtaty aıtyp otyrǵan zań «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» dep atalady. «Mańyzdy qujatty qabyldaý kezinde Mádenıet jáne sport mınıstri túzetýler konserttik oıyn-saýyq is-sharalaryn ótkizý kezinde týyndaıtyn birqatar máseleni retteıdi dep sendirgen edi. Alaıda kórip otyrǵanymyzdaı, retteı almady. Endeshe, qabyldanǵan zań talaptaryn qaıta kúsheıtý máselesi týyndap otyr. Zańnyń oryndalýyn qadaǵalaıtyn organdar Almaty qalasynda bolǵan konsert qoıýshylarǵa qatań shara qoldanýy kerek», dedi ol.
Eger zań tilimen aıtar bolsaq, jelikken jastardyń Týdy mazaq etkeni Qylmystyq kodekstiń 372-baby «Memlekettik rámizderdi qorlaý» boıynsha saralanady. Al bul baptyń sanksııasy boıynsha Qazaqstan Respýblıkasynyń memlekettik rámizderin qorlaǵandar 2 myń aılyq eseptik kórsetkishke deıingi mólsherde aıyppul salýǵa ne sol mólsherde túzeý jumystaryna ne 600 saǵatqa deıingi merzimge qoǵamdyq jumystarǵa tartýǵa nemese 2 jylǵa deıingi merzimge bas bostandyǵyn shekteýge, bolmasa sol merzimge bas bostandyǵynan aıyrýǵa jazalanady. Al kóptiń aldyna shyǵyp beıádep sóz aıtqany, etıkaǵa qaıshy qylyqtar kórsetkeni Ákimshilik quqyq buzýshylyq týraly kodekstiń 434-baby «Usaq buzaqylyqqa» jatady. Zań boıynsha qoǵamdyq oryndarda bylapyt sóılegen adamǵa 5 aılyq eseptik kórsetkish mólsherinde aıyppul salynady nemese 10 táýlikke ákimshilik qamaqqa alynady. Alaıda áleýmettik jelidegi pikirlerdi oqyp shyqqanda túsingenimiz – halyq kıeli sahnanyń qadirin ketirgenderge qatań shara qoldanýdy talap etip otyr. Ol – ulttyq qundylyǵymyzdy taptap, sahnada boqaýyz sózder aıtqan «Irına Kaıratovna» jáne «Shıza» esimimen tanylǵan jastardy múlde sahnaǵa jolatpaý.
Negizi, bıliktiń basy-qasynda júrgender jelide jelpingenderdi, tık-tokta tanylǵandardy qabyldap, qolyn alarda muqııat bolǵany jón. Sebebi jyltyraǵannyń bári altyn emes. Jastarymyzdyń máńgúrttenip, sanasynyń ýlanýy, ulttyq degradasııaǵa ushyraýynyń bir tamyry osynda jatyr. Áýmeser ánshi men esersoq akterlerdiń bárin memlekettik deńgeıde «marapattaıtyn» bolsaq, «tulǵa» bolýdyń joly osy eken dep uǵynatyn jastar da solar salyp júrgen soraqylyqtyń jolyn tańdaıtyny ashy da bolsa aqıqat.