Qaraǵandy oblysynda Ata Zańǵa ózgerister men tolyqtyrýlar engizý boıynsha ótetin referendýmǵa ázirlik jumystary qyza tústi. Qazirdiń ózinde osy maqsattaǵy barlyq qajetti quralmen jabdyqtalǵan, múmkindigi shekteýli jandar úshin jaǵdaı jasalǵan 777 ýchaske saqadaı saı tur.
Mańyzdy saıası oqıǵaǵa sanaýly kún qalǵanda oblys ákimdiginde referendým ótkizýge daıyndyq barysyn talqylaǵan keńeıtilgen otyrys ótti. Oǵan oblystyq referendým komıssııasynyń músheleri, departamentter men basqarmalardyń basshylary, beıneselektor rejiminde – qalalar men aýdandardyń ákimderi jáne aýmaqtyq referendým komıssııalarynyń tóraǵalary qatysty.
Qaraǵandy oblystyq referendým komıssııasynyń tóraǵasy Erqara Aımaǵambetov referendýmǵa daıyndyqtyń sheshýshi kezeńge jetkenin atap ótti.
– Jergilikti atqarýshy organdarmen birlesip qyrýar jumys atqaryldy. Búginde barlyq ýchaske 100 paıyzǵa daıyn dep aıtýǵa bolady. Materıaldyq-tehnıkalyq baza tolyq qamtamasyz etilgen. Múmkindigi shekteýli jandarǵa erekshe kóńil bólindi. Saılaýshylar tizimin naqtylaý jalǵasýda, – dedi E.Aımaǵambetov.
Otyrys barysynda sóz alǵan quqyq qorǵaý organdary men birqatar basqarmanyń basshylary da referendýmǵa ázirliktiń oıdaǵydaı júrip jatqanyn baıandady.
Eske sala ketsek, oblys ortalyǵy Qaraǵandyda 179 ýchaske bar. Onda daýys beretin saılaýshylar sany 330 872 adam bolady. Qaraǵandy qalasynyń ákimi Ermaǵanbet Bólekpaev bul jaýapty saıası is-sharaǵa daıyndyqtyń joǵary deńgeıde ekenin aıtty.
Sondaı-aq referendým qarsańynda Temirtaý qalasyndaǵy Qaraǵandy ındýstrıaldyq ýnıversıtetinde «Jańa Qazaqstan: jańa kózqaras» degen ataýmen qalalyq máslıhattyń depýtattarymen kezdesý ótti.
Is-shara barysynda Temirtaý qalalyq máslıhatynyń hatshysy Alekseı Lomakın «Konstıtýsııalyq reformalar týraly» taqyrybynda baıandama jasap, Ata Zańǵa engizilgeli jatqan ózgeristerdiń ómirsheńdigin, ózektiligin aıtyp, referendýmǵa turǵyndardyń oń kózqaraspen qaraýynyń óte mańyzdy faktor ekenin erekshe atap ótti.
Sondaı-aq «Referendým – halyqtyń óz erkin bildirýdiń bir nysany» taqyrybynda baıandama jasaǵan Qazaqstan tarıhy, áleýmettik-gýmanıtarlyq pánder kafedrasynyń meńgerýshisi Maǵıra Soltan bul saıası is-sharanyń Jańa Qazaqstan tarıhynda óte jaýapty ról oınaıtynyna basa mán berdi.
Qalalyq máslıhattyń depýtaty Sáýle Dúısebaeva, QIÝ-diń stýdentter parlamentiniń prezıdenti Araılym Tileýbektiń sózderi de osy arnada toǵysty. Bar maqsat – aldaǵy bolatyn mańyzdy oqıǵa – Konstıtýsııaǵa ózgerister men tolyqtyrýlar engizý boıynsha ótetin referendýmnyń oıdaǵydaı ótýine bir kisideı atsalysý.
Qaraǵandy oblysy