Astanadaǵy Dına Nurpeıisovanyń eskertkishi janynda Nur-Sultan qalalyq qoǵamdyq keńesi, qalalyq jastar saıasaty basqarmasy jáne «Kúı anasy» respýblıkalyq qorynyń uıymdastyrýymen «Kúı jármeńkesi» ótti. Aıta keteıik, kúı ónerin dáriptep, keleshek urpaqqa nasıhattaý maqsatyn kózdegen mádenı is-shara bıyl ekinshi ret ótip otyr.
Jármeńkede Batys Qazaqstan oblysy, Jańaqala aýdanynyń Q.Jantileýov atyndaǵy saz mektebiniń ulttyq aspaptar orkestri óner kórsetti. Alǵashqy «Kúı jármeńkesiniń» jeńimpazy Narqyz Qasymova men Qazaq ulttyq óner ýnıversıtetiniń stýdenti Aqedil Uzaqov óz ónerlerin kórsetip, kórermenniń qoshemetine bólendi. Sondaı-aq is-shara barysynda qatysýshylar Dına Nurpeıisovanyń eskertkishine gúl shoqtaryn qoıyp, kúıshiniń rýhyna taǵzym etti.
Mádenı jıynnyń bir ereksheligi – kórermen arasynan ónerpazdar ortaǵa shyǵyp, kúı tartty. Erekshe ónerimen kózge túsken kórermenge uıymdastyrýshylar atynan úkili dombyra men «Kúı anasy» kitaby tabystaldy.
«Bastamamyzdyń maqsaty – jas urpaqtyń sanasyna tól ónerimizdi sińirý. Bul úrdis aldaǵy ýaqytta tek Nur-Sultan qalasynda ǵana emes, respýblıkamyzdyń barlyq óńirinde de jalǵasyn tapsa deımiz. Elimizdegi qanshama talantty balalardyń ónerin tamashalap, tól ónerimizge degen mahabbatyn arttyrý maqsatynda uıymdastyrǵan jármeńkemizge kelgen barsha kórermenge alǵysymyzdy bildiremiz. Ulttyq ónerdi súıetin, dáripteıtin urpaǵymyzdyń bary bizdi qýantady», deıdi qoǵam qaıratkeri, «Kúı anasy» respýblıkalyq qorynyń jetekshisi Tólegen Qýanyshev.
Eske sala ketsek, Dına Nurpeıisovanyń eskertkishi byltyr «Ulttyq dombyra kúni» qarsańynda ashylǵan edi. Eskertkish avtory – músinshi Jalyn Baýyrqan.
Erkenaz QORDABAI,
L.N.Gýmılev atyndaǵy
Eýrazııa ulttyq ýnıversıtetiniń stýdenti