Tennısten Qazaqstan áıelder quramasy álemdik reıtıng tarıhynda tuńǵysh ret eń úzdik on quramanyń qataryna qosyldy. Bul týraly QTF baspasóz qyzmeti habarlady.
Bıllı Djın Kıng kýbogynyń jańartylǵan reıtıngine saı, el quramasy 16-orynnan birden jeti saty joǵarylap, 9-orynǵa kóterildi. Qazaqstan ulttyq quramasy Reseı, Germanııa, Italııa, Rýmynııa, Belgııa, Polsha sekildi alpaýyt komandalardy artqa qaldyryp, TOP-10 quramanyń qatarynan tabyldy. Qazaqstandyq qyzdar bıylǵy sáýirde elordada Germanııa tennısshilerin 3:1 esebimen tize búktirip, komandalyq álem chempıonatynyń fınaldyq kezeńine joldama alǵan bolatyn.
Álemdik reıtıngte alǵashqy 10 komanda bylaısha ornalasty: 1. Aýstralııa – 1002,71 upaı 2. Fransııa – 885,6 3. Ispanııa – 884,62 4. Chehııa – 842,92 5. Shveısarııa – 881,81 6. Kanada – 780,09 7. AQSh – 758,09 8. Slovakııa – 744,23 9. Qazaqstan – 704,75 10. Germanııa – 702,52.
Aıta keteıik, bıylǵy Bıllı Djın Kıng kýbogynyń fınaldyq kezeńi 8-13 qarasha aralyǵynda ótedi. Ázirshe qaı elde uıymdastyrylatyny belgisiz.