Referendýmda daýys berip bolǵannan keıin BAQ ókilderi Prezıdent Qasym-Jomart Toqaevtan qańtar oqıǵasyn tergeý jumystary týraly surady, dep habarlaıdy Egemen.kz.
«Quzyrly organdar tergeý júrgizip jatyr, óte tyńǵylyqty, egjeı-tegjeıli tergeý júrip jatyr. Qazir qolda bar materıaldyń bárin Bas prokýratýra jarııalap otyr. Qoǵamǵa qatysty nemese qoǵamnan jasyryp otyrǵan eshbir málimet joq. Bárin ashyq, transparentti turǵyda, joǵary kásibı deńgeıde istep otyrmyz. Sondyqtan halyqaralyq sarapshylardy shaqyrýdyń qajeti joq, men solaı oılaımyn», dedi Oqýshylar saraıyndaǵy referendým ýchaskesinde BAQ ókilderiniń suraqtaryna jaýap bergen Qasym-Jomart Toqaev.
Prezıdent qańtar oqıǵasynyń saldary aýyr bolǵanyn eske saldy.
«Shynymen de, bandıtter men terrorıster keltirgen zııannyń aýqymy úreı týǵyzbaı qoımaıdy. О́ıtkeni 1600 qyzmettik, kommersııalyq ǵımarat órtelip, 3000 qarý urlandy jáne árıne, qaza bolǵandar bar. Olardyń ishinde bandıtter men trerrorıster de bar. Biz muny memlekettiń qurylymyn ydyratýǵa baǵyttalǵan terrorıstik shabýyl boldy degennen tanbaımyz. Sondyqtan biz oǵan qatysy bar adamdardy tikeleı qatysy bolsa da, janama qatysy bolsa da, uıymdastyrýǵa qatysy bolsa, tipten jaýapkershilikke tartylýy kerek tartý kerek dep otyrmyz. Memleketke qarsy operasııanyń sıpaty onyń tyńǵylyqty daıyndalǵanyn kórsetti. Jaqsy daıyndyǵy bar kásibı adamdar basqaryp otyrǵan», dedi Memleket basshysy.
Sondaı-aq Prezıdent elimizdiń 13 qalasynda bılikke qarsy shabýyl bir mezette tutanǵanyn, sol arqyly qoǵamdyq tártipti buzý kózdelgenin atap ótti.
«Qazir 5,5 myń qylmystyq is qozǵaldy, 500 qylmystyq is sotqa joldandy. Sonyń ishinde 23 adamǵa ǵana naqty merzim kesilgenine nazar aýdartqym keledi. Iаǵnı, bul qaıǵyly oqıǵany zertteýge tyńǵylyqty qarap otyrǵanymyzdy kórsetedi. Buǵan deıin aıtqanymdaı, qańtar tragedııasynyń resıdıvi qaıtalanýyna jol joq. Onyń kepili, búgingi referendým bolmaq. Biz tıisti sabaq aldyq», dep túıindedi Qasym-Jomart Toqaev.
Sondaı-aq Memleket basshysy qańtar oqıǵasy kezinde mert bolǵandardyń tizimi jarııalanatynyn málim etti.