Qaı eldi mekenniń de taza bolýy nemese kúl-qoqysqa belshesinen batyp jatýy sonda turatyn adamdardyń kóńil kúıine jaqsy ne jaman jaǵynan áser etetini aıtpasa da túsinikti jaıt. Sondyqtan kim-kimde ózi ómir súrip jatqan jeriniń tazalyǵyna qajetti deńgeıde mán berse, soǵan saı kóńil kúıiniń de ár kez kóterińki júretini kúmánsiz.
Iаǵnı osy ıgilikti iske basshy men qosshy da, eldi meken tazalyǵyna tikeleı jaýapty mekeme qyzmetkerleri men jumysshylary da, tipti qarapaıym turǵyndar da qal-qaderlerinshe úlesterin qossa, nur ústine nur bolatyny taǵy aıan.
Osy oraıda aıta ketetin bir jaıt – kez kelgen irili-usaqty eldi mekenderdegideı, qala tazalyǵyna tikeleı jaýapty «Qyzylorda tazalyǵy» da tirshiligi qysy-jazy tolas tappaıtyn mekemelerdiń biri. Jumys barysynda tazalyqshylar qoǵamdyq kólikpen kúnine birneshe márte shahardyń ár buryshyna qatynap jatady. Ár mingen saıyn 90 teńge tólep, jalaqysynyń biraz bóligin jolǵa jumsaıtyn mekeme jumysshylarynyń osy máselesi jýyrda sheshimin tapty.
«Qyzylorda tazalyǵy» KMM jumysshysy Gúlaıym Qarǵabaevanyń osy salada jumys istep kele jatqanyna 20 jylǵa jýyqtapty. Oblys ákimi Nurlybek Nálibaevtyń turǵyndardy jeke máselelerimen qabyldaýyna jazylǵan ol jolkireniń qaltany ortaıtyp turǵanyn aıtyp, aımaq basshysynan kómek suraıdy. Turǵyn tilegine túsinistikpen qaraǵan aımaq basshysy dál sol mezette qala ákimi Asylbek Shámenovke 1 maýsymnan bastap qoǵamdyq kólikte tazalyqshylar úshin tegin júrý bıletin ázirleýdi tapsyrǵan-tyn.
«Kúnniń ystyq, sýyǵyna qaramastan qalanyń tazalyǵyn saqtap júrgen jumysshylarǵa qurmetimiz erekshe. Shahardyń shyraıyn kirgizip turǵan osy azamattarǵa barynsha qoldaý kórsetilýi qajet. Sol sebepti, 1 maýsymnan bastap bul mekemeniń barlyq qyzmetkeriniń qoǵamdyq kólikte tegin júrýin uıymdastyramyz», degen bolatyn oblys basshysy.
Biz bul habarymyzben kez kelgen iri qalalarda, oblys ortalyqtarynda engizýge bolatyn jaǵymdy jańalyq retinde bólise ketkendi jón kórdik.
Baqytjan ABYZOV,
qala turǵyny
QYZYLORDA