Eline, týǵan jerine asa adal azamattar tym kóp dep maqtana almasaq kerek. Biraq Allanyń boıyna erekshe qasıet berip jaratqan adamdary bolady. Sol qasıetin óz boıyna ǵana emes, týǵan jerine adal jaratyp, úlken paıdasyn tıgizip júrgen azamattardyń biri Baqtııar Qojahmetov dep bilemin.
Ol kisiniń Otanyn, onyń ishinde týǵan jerin sonshalyqty súıetinin bizdiń «Ulytaý» qoryq-murajaıyna qyzmetke kelgen soń-aq jaqynyraq bile bastadyq. Jumysyn 2009 jyly dırektordyń orynbasary bolyp bastaǵan aǵamyz sál ýaqyt oza dırektorlyqqa taǵaıyndalyp, osy qyzmetti 2021 jyldyń jartysyna deıin atqardy. Sol aralyqta murajaı qyzmetkerlerine taǵylym alar kóp nárse úıretti. «Ustazdan shákirt ozar» demekshi, ol kisiniń tárbıesin kórgen talaı jas búginde túrli laýazymdy qyzmetterde eńbek etip júr.
Shyny kerek, alǵashynda bul kisini aspandaǵy Aıǵa umtylǵan qııalshyl azamat retinde qabyldadyq, biraq josparlaryn birden iske asyryp, bizdi biraz tańǵaldyrdy. Máselen, 1991 jyly túıe kerýenimen Uly Jibek jolynyń boıymen júrip ótken «Otyrar – Ulytaý» jáne 1999-2005 jyldardaǵy Uly Eýrazııa dalasymen Majarstanǵa deıingi «Altaı – Dýnaı» ekspedısııalary osy sózimizdiń aıqyn aıǵaǵy. Sóıtip, atalǵan eki ekspedısııanyń nátıjesinde Ulytaý biraz shet memleketke tanylyp, maqsat údesinen shyqqan bolatyn. Jalpy, Bákeń bes jylda alty baǵytta «Ulylyqqa taǵzym» ekspedısııasyn uıymdastyryp, qyzmetkerlerine úlken múmkindik jasaǵan edi.
Ekspedısııa músheleri issaparlary barysynda Ulytaý tarıhy jaıly jyljymaly fotokórmeler ótkizip, maqalalar uıymdastyrdy jáne telearnalarǵa suhbattar berdi. Sonymen qatar damyǵan týrızm ortalyqtarymen, tarıhı oryndarmen, murajaılyq áriptesterimen tanysyp, is-tájirıbe almasyp, jádigerler jınaqtap, kóptegen ıgilikti is atqardy. Al jarǵaq qulaǵy jastyqqa tımeı eńbek etip júrgen aǵamyz búginde asqaraly 60 jastyń belesine de kóterilip qalypty. Ol kisini osy mereıli jasymen quttyqtaı otyryp, arman-maqsattaryńyzǵa jete berińiz, ǵumyrly bolyńyz degen tilek qosamyz.
Baıan ShAIGOZOVA,
«Ulytaý» qoryq-murajaıynyń bas qor saqtaýshysy
Qaraǵandy oblysy